Rıdderdegi jylý qazandyǵynan taǵy da órt shyǵyp, qalada tótenshe jaǵdaı jarııalandy. О́rt bir emes, birneshe qazandyqtan shyqqan. Artynsha otyn berý jolynda da jarylys boldy. Demek jylý elektr ortalyǵynyń jańa ıeleri júktelgen jaýapkershilikti oıdaǵydaı oryndaı almaǵan.
– Qalanyń JEO jumysynda úlken kemshilikter bar, jańa menshik ıesi qańtardan bastap máseleni sheshe qoıaıyn dep qulyq tanytpady. 3 mlrd teńgeden asa qaryzdary jáne bar. Mazýt, kómir jetkizý de úlken problema bolyp otyr. Elektr energııasy jaǵynan da suraq kóp. Qarasha aıyndaǵy shuǵyl jóndeý, qalpyna keltirý jumystaryn júrgizgen kompanııalardyń eńbekaqysy da tólenbegen kórinedi. Endi mine, taǵy da órt shyqty, jarylys boldy, – deıdi oblys ákimi Danıal Ahmetov.
Qystaı jylýǵa jarymaǵan Rıdder qalasynyń turǵyndary bul máseleden ábden zárezap bolǵan. Páterlerdiń sýyqtyǵyna úırenisip te ketken sekildi. Úırenisip deımin, amaldyń joqtyǵy ǵoı. Atoılap ákimdiktiń esiginde júrseń de, bul máseleniń túıini jýyq arada sheshile qoıady degenge sený qıyn.
– Rıdderde áli qys. Kún kózi shyqqanmen, tún sýyq. Qystaı jylý qubyrlary qanjylym ǵana bolyp turdy. Sońǵy bir apta úı ishi, tipten sýyp ketti. Qazandyqqa jańa qojaıyn keldi degendi estip, másele sheshiler dep oılap edik, beker eken. Bıyl áýpirimdep, jazǵa ilinermiz. Endi keler qysqa deıin bárin jóndep qoısa ǵoı, – deıdi Rıdderdiń turǵyny Máýlııa Dónenbaeva.
Bul, álbette, barlyq qala turǵynynyń tilegi. Endigi kezektegi kúrmeýi qıyn problemany sheshýdiń jalqy joly jylý ortalyǵyn kommýnaldyq menshikke berý desedi oblys basshylyǵy. Qazir oblys ákiminiń aıtýynsha, otyn men qajetti jabdyqty jetkizý máseleleri tolyǵymen sheshildi. Alaıda mekemeniń qaryzy 3 mlrd teńgeden asyp ketti.
Sonymen qatar ShQO prokýratýrasy mamandaryn tarta otyryp, kásiporyn qyzmetine tekserý jumystary júrgizildi. Nátıjesinde, «Rıdder JEO» AQ-nyń tehnıkalyq jaı-kúıi talapqa tolyq saı emes ekeni anyqtaldy. Resmı málimetke sensek, 240-tan asa zań buzýshylyqtar anyqtalǵan.
Prokýratýranyń qadaǵalaý aktileri boıynsha ýákiletti organdar JEO basshylyǵyna qatysty 11 mln teńgeden asa soma mólsherinde ákimshilik jaza qoldanyp, buzýshylyqtardy joıý týraly nusqama shyǵardy. Onymen qoımaı, prokýrorlyq tekserý kezinde tabıǵı monopolııalar týraly zańnamany buzý, ıaǵnı 548 mln teńge somasyna tarıftik smeta men ınvestısııalyq baǵdarlama qarajatyn maqsatsyz jumsaý anyqtaldy.
Oblys ákimi de jańa ınvestordyń jabdyqtardy jóndeýge qarajat jumsamaǵanyn aıtady. Nátıjesinde, ekinshi qaıtara tótenshe jaǵdaı jarııalanyp, qazandyq jumystaryn júrgizýdi oblys basshylyǵy ýaqytsha óz qolyna aldy.
– Biz Rıdder JEO-nyń jańa ıesinen úmit joq ekenin kórip otyrmyz. Sondyqtan, meniń oıymsha, jylý kózin kommýnaldyq menshikke berý kerek, – dedi D.Ahmetov.
Rıdder qalasy