Kóktemgi egis jumystary bastalǵannan beri Qazaqstannyń ońtústik óńirlerinde dıhandar 311,4 myń gektar jerge egin ekti, onyń basym bóligi dándi jáne jemshóp daqyldary. Jalpy, búkil el boıynsha 23,4 mln ga jer egý josparlanyp otyr. Bıyl dándi, jemshóp, kókónis jáne baqsha daqyldarynyń egis alqaptary ulǵaıady, dep habarlaıdy Egemen.kz AShM baspasóz qyzmetine silteme jasap.
Aýyl sharýashylyǵy qurylymdarynda 160 myń traktor, 5 myńnan astam joǵary ónimdi egis keshenderi, 78 myń sepkish jáne 226 myń topyraq óńdeý quraldary bar. Tehnıkanyń barlyǵy derlik jappaı egis jumystarynyń bastalýyna tolyǵymen daıyn.
Kóktemgi egis naýqanyn ótkizýge óńirlerge 413 myń tonna jeńildikti dızel otyny bólindi, bul ótken jylǵy deńgeıden 13 myń tonnaǵa artyq.
Operatorlardyń shyǵystaryn eskere otyryp, respýblıka boıynsha aýyl sharýashylyǵy taýaryn óndirýshiler úshin dızel otynynyń ortasha quny 204 teńge/lıtrdi quraıdy, bul naryqtyq baǵadan 15-20 paıyzǵa arzan. Búgingi tańda óńirlerge shamamen 163 myń tonna otyn nemese jospardyń 44 paıyzy jóneltildi.
Bıylǵy jyldan bastap egiske bólinetin dızel otynyn maqsatsyz paıdalanýdy boldyrmaý úshin operatorlarǵa MО́Z-den jóneltý elektrondyq shot-faktýralardyń aqparattyq júıesinde jeke vırtýaldy qoıma qurý sondaı-aq arnaıy boıaǵyshtar qosý shartymen júzege asyrylady. Budan basqa, aýyl sharýashylyǵy jumystaryna tıeletin dızel otynynyń kólemine MО́Z-ge jeke PIN-kod beriledi.
Bıylǵy jyly 700 myń tonnadan astam tyńaıtqysh engizý josparlanǵan, onyń 63% otandyq ammıak selıtrasy men ammofosqa tıesili. Búgingi tańda kóktemgi egis jumystaryn júrgizý úshin sharýalarǵa 177,3 myń tonnasy jóneltildi. Jergilikti bıýdjetterde tyńaıtqyshtardy satyp alýdy sýbsıdııalaý baǵdarlamasyna 31,3 mlrd teńge qarastyrylǵan.