6 sáýirde Qazaqstan bankteri men uıaly baılanys operatorlary alaıaqtyqtyń jańa túriniń paıda bolýyna baılanysty birlesken málimdeme jasady, dep habarlaıdy Egemen.kz.
Beeline, Eurasian Bank, Forte Bank, Halyk Bank, Home Credit Bank, Jusan Bank, Kaspi Bank, Kcell, Nurbank, Tele2/Altel, Sentr Kredıt Banki, Bank VTB (Qazaqstan) birlesken málimdemesinde kórsetilgendeı, qarjylaı alaıaqtyqtyń jańa túri paıda bolǵan.
Qazaqstandyqtardy yqtımal qarjy shyǵynynan qorǵaý úshin bankter men uıaly baılanys operatorlary alaıaqtardyń qalaı aldaıtynyn aıtyp berdi:
Alaıaq Qazaqstan nemese sheteldik nómirden qońyraý shalyp, ózin bank qyzmetkeri retinde tanystyrady. Ol telefon baılanysynyń qaýipsiz emes ekenin aıtyp, WhatsApp nemese basqa messendjerge aýysýdy usynady.
Messendjerdegi chatta alaıaq bank qyzmetkeriniń jalǵan jeke kýáliginiń sýretin jiberedi.
Alaıaq «Sizdiń qarajatyńyzdy urlamaq» dep málimdep, aqshańyzdy «qaýipsiz shotqa» aýdarýǵa kóndiredi. Osydan keıin ol aqshamen birge joǵalady.
«Qazaqstan bankteriniń qyzmetkerleri telefon arqyly sóıleskende eshqashan basqa shottarǵa aqsha aýdarýdy usynbaıtynyn, qupııa sózderińiz ben kodtaryńyzdy suramaıtynyn resmı túrde málimdeımiz. Qazaqstan bankteriniń qyzmetkerleri eshqashan klıentterge sheteldik nómirlerden qońyraý shalmaıdy», delingen birlesken málimdemede.
Ádette alaıaqtar shetelde bolady. Buryn olar arnaıy ınternet qyzmetteriniń kómegimen sheteldik telefon nómirin qazaqshaǵa aýystyratyn. Alaıda qazaqstandyq uıaly baılanys operatorlary mundaı aýystyrý múmkindigin shektedi. Osylaısha, alaıaqtardyń qazaqstandyqtardyń keıpin kórsetýi qıyndap ketti. Sondyqtan olar sheteldik nómirlerden habarlasady. Olar sheteldik nómirdiń senim týdyrmaıtynyn túsinedi. Sondyqtan olar profıl sýretine tanymal banktiń logotıpin qoıady da, messendjerdegi «qaýipsiz chatqa» ótýdi usynady.
Sonymen qatar shabýyldaýshylar alaıaqtyqtyń burynnan belgili túrlerin áli de paıdalanyp júr. Saq bolyńyz! Sóılesýdi dereý toqtatyńyz! (Kúdikti qońyraý týraly habarlaý jáne shottaryńyzdyń qaýipsiz ekenine kóz jetkizý úshin banktiń baılanys ortalyǵyna qońyraý shalýǵa bolady.) Eshqashan eshkimge SMS habarlamalardaǵy qupııa kodtardy, ınternet-banktegi jeke kabınetińizdegi qupııa sózdi aıtpańyz. Qońyraý shalýshylardyń ótinishi boıynsha basqa shottarǵa aqsha aýdarýǵa bolmaıdy. Eshbir jaǵdaıda olardyń nusqaýlary boıynsha belgisiz mobıldi qosymshalardy júktep almańyz. Beıtanys adamdar jibergen siltemeni ashpańyz. «Osy qarapaıym qaýipsizdik erejesi ózińizdi alaıaqtardan qorǵaýǵa jáne aqshańyzdy joǵaltpaýǵa kómektesedi», delingen birlesken málimdemede.Buǵan deıin alaıaqtardyń Qazaqstan qor bırjasynyń (KASE) jalǵan saıtyn jasaǵany habarlanǵan edi.