Aqtóbede kolledj dırektory jalǵan qujat jasaǵany úshin sottaldy. Ol synyptasyna mektep aspazdarynyń biliktiligin arttyrý kýrsyn bitirgeni týraly sertıfıkattar jasap, jumysy úshin 14 myń teńge alǵan, dep habarlaıdy Egemen.kz.
Qala mektepteriniń birinde qyzmet etetin aspaz qajetti qujattardy rásimdeý maqsatynda synyptasynyń kómegine júgingen. Ol oqý ornynyń basshylyǵy olardy biliktilikti arttyrý kýrstaryna jiberýge májbúrlep jatqanyn aıtqan.
Kolledj dırektory oǵan «Mektep oqýshylaryn tamaqtandyrýdyń zamanaýı tehnologııalary» taqyrybynda biliktilikti arttyrý kýrstarynan ótkeni týraly sertıfıkat jasap berýge ýáde bergen, oǵan qosa shyn máninde sabaqqa barýdyń qajeti joq dep túsindirgen. Synyptasy men onyń áriptesine óziniń kompıýterinen eki sertıfıkatty shyǵaryp, qolyn qoıyp 14 myń teńge alǵan.Nátıjesinde, 60 jastaǵy kolledj dırektorynyń aıla-amaldary áshkerelenip, oǵan alaıaqtyq jasady degen aıyp taǵyldy. Sot onyń kýálikteriniń nysany zańdy, biraq mazmuny boıynsha jalǵan ekenin anyqtady.
Kúdikti óz kinásin moıyndady. Sot oǵan 140 myń teńge aıyppul saldy. Sot úkimimen ol ómir boıy memlekettik qyzmette jumys isteı almaıdy.