Bas prokýratýranyń baspasóz qyzmeti 10 jylǵa bas bostandyǵynan aıyrylǵan Serik Kúdebaevqa qatysty tyń derekter jarııalady, dep habarlaıdy Egemen.kz.
Taldyqorǵan qalalyq sotynyń úkimimen S.M.Kúdebaev «Qańtar oqıǵasy» kezinde bılikti asyra paıdalanǵany úshin kináli dep tanylyp, 10 jylǵa bas bostandyǵynan aıyryldy. Ol ortasha qaýipsizdik mekemesinde jazasyn óteı otyryp, polısııa general maıory arnaıy ataǵynan aıyryldy.
S.M.Kúdebaev Qazaqstan Respýblıkasy Konstıtýsııasynyń, Memleket basshysynyń «Tótenshe jaǵdaı engizý týraly» Jarlyǵynyń, «Quqyq qorǵaý qyzmeti týraly» jáne «Ishki ister organdary týraly» zańdarynyń normalaryn buzyp, sondaı-aq vedomstvoishilik buıryqtar men arnaıy josparlardyń talaptaryn oryndamaǵan.
Tótenshe jaǵdaı kezinde qoǵamdyq qaýipsizdikti qamtamasyz etýdiń ornyna, S.M.Kúdebaev jeke quramǵa ǵımarattan ketýge buıryq bergen. Jergilikti jerdiń komendanty retinde jedel shtabtyń tıisti jumysyn jáne aımaqtaǵy jaǵdaıdy turaqtandyrý boıynsha ýaqtyly sharalar qabyldaýdy qamtamasyz etpegen.
Budan soń tonaýshylar saýda úıleri men bıznes nysandaryn tonady. Bankomattar men sýpermarketterdiń dúńgirshekterin qıratyp, oblys ákimdigi, «Amanat» partııasy ǵımarattaryna shabýyl jasap, órtedi.
Qylmyskerler quqyqtyq tártip kúshteri bolmaǵan kezde oblystyq Polısııa departamenti men Taldyqorǵan qalasy Polısııa basqarmasynyń ǵımarattaryn basyp alý kezinde 500-ge jýyq qarý men 28 myńnan astam oq-dári urlanǵan, olardyń birazy áli tabylǵan joq.
Memleketke, azamattarǵa jáne kásipkerlerge keltirilgen zalaldyń jalpy somasy shamamen 5 mlrd teńgeni qurady.
2022 jylǵy 7-16 qańtar aralyǵynda Polısııa departamentiniń ǵımaratynda 23 azamatqa qatysty jappaı azaptaý qoldanyldy.
Sonymen qatar S.M.Kúdebaevtyń kóz aldynda onyń qaramaǵyndaǵylar departament aýmaǵynda jetkizilgen adamdardy uryp-soqqany beınekameralarǵa jazylǵan.
Tyıym salynǵan tergeý ádisteriniń nátıjesinde atalǵan azamattardyń densaýlyǵyna ártúrli dárejedegi zııan keltirilgen.
S.M.Kúdebaevtyń kinási qylmystyq is boıynsha jınalǵan dáleldemeler jıyntyǵymen tolyq dáleldendi.