Bıyl sáýir salqyndaý bolǵandyqtan ba, taıyz sý qoımalaryndaǵy balyqtar qyrylyp jatyr. Tabıǵattyń tylsym zaýaly 4 sáýirde Qostanaı aýdanyndaǵy Ozernyı aýylynyń shetindegi kólde, 5 sáýirde Zarechnyıdyń mańyndaǵy sý qoımasynda baıqalǵan. Balyq ınspeksııasynyń mamandary dereý Zarechnyıdaǵy sýdan synama alyp, jarty tonnadan astam óli balyq terip aldy.
Araǵa jıyrma kún salyp Altynsarın aýdanyna qarasty Sılantev eldi mekeniniń mańynda taǵy balyq qyryldy. Aýyl shetindegi ataýsyz kólge at basyn tiregen oblysaralyq balyq sharýashylyǵy ınspeksııasynyń ókilderi men tabıǵı resýrstar jáne tabıǵat paıdalanýdy retteý basqarmasynyń mamandary jaǵadan 427 kılo móńke balyq terip alyp, sanıtarlyq-epıdemııalyq talapqa sáıkes birin qaldyrmaı joıdy.
Sýdan synama alǵan ekologııa departamentiniń zerthana mamandary taldaý nátıjelerin keıinirek jarııa etetinin málimdedi.
– Atalǵan sý qoımasy jergilikti mańyzy bar balyq sharýashylyǵy sý qoımalarynyń tiziminde joq. Sondyqtan eshkimge bul kólden balyq aýlaýǵa tyıym salynbaǵan. Al móńke balyqtyń qyrylý sebebi tereńdigi nebári 80 sm bolatyn taıyz sýdyń tabanyna deıin qatyp qalýynan bolýy múmkin, – dedi oblystyq ekologııa departamentiniń baspasóz hatshysy Karına Aıtmuhambetova.
Qostanaı oblysy