Ál-Farabı atyndaǵy Qazaq ulttyq ýnıversıtetinde «Digital Farabi» stýdenttik IT forýmy ótip, onda salanyń bilikti mamandary, iri kompanııa basshylary, bıznes ókilderi men ınvestorlar bas qosty.
IT mamandaryn daıarlaý, túlekterge arnalǵan bos oryndar jármeńkesin uıymdastyrý, stýdenttik IT startaptardy damytýdy maqsat etken forýmǵa QazUÝ basqarma tóraǵasy-rektor Janseıit Túımebaev qatysyp, forýmnyń stýdentter úshin IT-tehnologııalar salasynda tájirıbe jınaqtap, óz daǵdylaryn nyǵaıtýǵa múmkindik beretinin atap ótti.
«Memleket basshysy Qasym-Jomart Toqaev «2025 jylǵa qaraı keminde 100 myń joǵary bilikti IT-mamandar daıarlaý» mindetin qoıǵany belgili. Búginde álemdik naryqty IT salasynda 100 mln mamandardyń jetispeýshiligi alańdatady. 2025 jylǵa qaraı bul suranys 200 mıllıonǵa deıin artýy yqtımal. QazUÝ árdaıym stýdentterge sapaly bilim berýge jáne olardyń ózin-ózi jan-jaqty damýy men shyǵarmashylyq jumystaryn iske asyrýǵa barlyq jaǵdaı jasaı jasaı otyryp, ár salada jetistikke jetken túlekter men talantty jastardyń basyn qosatyn dıalogtar uıymdastyrýda», dedi Janseıit Túımebaev.
Erkin formatta uıymdastyrylǵan kezdesýde «ASUS» kompanııasynyń tehnıkalyq menedjeri Amantaı Altanuly, Factorial Incubator baǵdarlamasynyń negizin qalaýshy Arman Súleımenov, Sınhýa ýnıversıtetiniń professory Chjan Výshen, «ZTE» marketıng boıynsha jetekshi sarapshysy Egor Manıýkov, «Baiterek Venture Fund» AQ Dırektorlar keńesiniń múshesi ári kásipker Dana Blıeva jáne ózge de sarapshylar men kásipkerler baıandama jasap, IT álemniń ózekti máselelerin talqylady.
Forým aıasynda stýdent jastarǵa arnalǵan bos oryndar jármeńkesi ótti. Jastarǵa memlekettik mekemeler, JShS, ekinshi deńgeıdegi bankter, iri kompanııalar jumys usyndy. Sonymen qatar stýdentter atalǵan mekemelerden jazǵy óndiristik tájirıbeden ótýge múmkindik aldy.
Ýnıversıtettegi jas ǵalymdardyń ınnovasııalyq jobalaryn kópshilikke keńinen tanystyrý maqsatynda stýdenttik IT startaptar kórmesi, sondaı-aq bilim alýshy jastar arasynda «FIFA PS5» jarysy ótti.
Forým sońynda úzdik startaptardyń avtorlary men «FIFA PS5» jeńimpazdaryna dıplom jáne baǵaly syılyqtar berildi.