Bul týraly Memleket basshysy Qasym-Jomart Toqaev Qytaıdyń CCTV telearnasyna bergen suhbatynda aıtty, dep habarlaıdy Egemen.kz.
– Ádildikti tý etken Jańa Qazaqstan qurǵyńyz keletinin talaı ret aıttyńyz. О́zińizdiń el basqarý fılosofııańyz týraly qysqasha aıtyp ótseńiz. Jalpy, Qazaqstandy qaı baǵytta damytqyńyz keledi?
– Men elimniń Eýrazııa qurlyǵynda júrip jatqan úderisterdiń ortasynda bolǵanyn qalaımyn. Qazaqstan álemniń osy bóligindegi saýda joldary men halyqaralyq qatynastardy retteýde asa mańyzdy ról atqarady. Qazaqstannyń bolashaǵy jarqyn bolatynyna senimdimin. Sol sebepti elimdi ekonomıkasy damyǵan, ozyq elderdiń qataryna qosý úshin bar kúsh-jigerimdi jumsaımyn.Qazaqstan osyndaı syrtqy saıasat ustansa, tabysqa jetedi. Beıbitshilikti jaqtaý, barlyq elmen tıimdi dostyq qatynasta bolý bizdiń tarıhı taǵdyrymyzǵa jazylǵan. Eń aldymen, kórshiles eldermen aradaǵy dostyǵymyzǵa basa mán beremiz. Bul rette Qytaı asa mańyzdy ról atqarady.
– Endi áńgimemizdi Qytaı men Qazaqstan arasyndaǵy qatynastar máselesine qaraı buraıyq. Qarym-qatynastardy eki tarap ta turaqty ári jan-jaqty strategııalyq seriktestik retinde sıpattaıdy. Negizi, bul – Qytaıdyń syrtqy saıasatynda erekshe jaǵdaı. Osy termınniń qalyptasýyna óz úlesińizdi qosqanyńyzdy bilemin. Jalpy, Qazaqstannyń qazirgi syrtqy saıasatynda Qytaıdyń orny qandaı?
– Qytaı bizdiń syrtqy saıasatymyzda asa mańyzdy ról atqarady. 2019 jyly qyrkúıek aıynda men Qytaıǵa memlekettik saparmen bardym. Biz QHR Tóraǵasy Sı Szınpınmen nátıjeli kelissóz júrgizdik. Halyqtarymyzdyń yntymaqtastyǵyn nyǵaıtý úshin eki jaqqa da tıimdi saıasat júrgizý jóninde ýaǵdalastyq. Demek, biz eki el arasyndaǵy strategııalyq seriktestikti, máńgi dostyqty nyǵaıta túsýimiz kerek. Bul qazaq halqynyń múddesine, naqtyraq aıtqanda, uzaqmerzimdi múddesine tolyq saı keledi. Men osyndaı saıasatty berik ustanýǵa nıettimin. Jaqyn kórshimiz – Qytaımen aradaǵy strategııalyq seriktestiktiń mańyzdy ekeni sózsiz.
– Qytaı men Ortalyq Azııa elderi bir-birimen jaqyndasa tústi degen pikirler bar. Osyǵan baılanysty ne aıtasyz? Osyndaı geosaıası tepe-teńdik jaǵdaıynda elderdiń jaqyndaı túsýine alańdaýshylyq bildirýshiler de joq emes.
– Bul jóninde eshqandaı kúmándi pikir bolmaýǵa tıis. Sebebi bizdiń nıetimiz – túzý ári shynaıy. Qytaı ekonomıkasy álemde ekinshi orynda tur. Sondyqtan Qytaıdyń atqaratyn róli joǵary jáne sizdiń elińizben jaqsy qarym-qatynasta bolamyz.
- Jalpy, ekijaqty ekonomıkalyq qatynastardy aldaǵy ýaqytta qalaı damytqyńyz keledi? – Ekonomıkalyq yntymaqtastyq salasynda keremet nátıjelerge qol jetkizdik. Biraq biz alǵa qaraı jyljýymyz kerek. Sondyqtan men Qytaı órkenıetiniń besigi sanalatyn Sıan qalasyna jasaıtyn aldaǵy saparymnan úmitim mol. Bizge jańa kelisimder, jańa mámileler qajet. Sebebi biz bir orynda qalyp, nátıje kútip otyrmaýymyz kerek. Osynaý kúrdeli álemde ekonomıkalyq baılanystarymyzdy nyǵaıtýǵa kúsh salýǵa tıispiz. Men eki el jastarynyń yntymaqtastyǵy men dostyq qarym-qatynasyn damytýǵa nıettimin. Jas býyn birin-biri jaqsy bilýi qajet.