О́zbekstan astanasy Tashkentte bokstan erler arasyndaǵy XXII álem chempıonaty óz máresine jetti, dep habarlaıdy Egemen.kz Sportty damytý dıreksııasynyń baspasóz qyzmetine silteme jasap.
Fınalda taǵy 3 otandasymyz – Mahmud Sabyrhan, Aslanbek Shymbergenov pen Nurbek Oralbaı judyryqtasyp, bári jeńiske jetti.
Aldyńǵy álem chempıonatynyń kúmis júldegeri Mahmud Sabyrhan (54 kg) bul fınalda sol kezdegi qatelikterine jol bergen joq. Otandasymyz rıng qojaıyny Oıbek Djýraevpen jekpe-jekte bar sheberligimen tańǵaldyrdy. Muny qaptaldaǵy tóreshiler de moıyndady. Tipti, 21 jastaǵy boksshymyz 3-raýndta qyrǵyz tóreshisine 2 márte nokdaýn tirketti. Qazaq boksshysy osyǵan deıin sharshy alańda Kýba, Gana, Úndistan men Majarstan sportshysyn tize búktirgen.
Esterińizge sala keteıik, Mahmud 2 jyl burynǵy Belgradtaǵy álem chempıonatynda da kúmis júldege ıe bolǵan.
Ulttyq qurama kapıtany Aslanbek Shymbergenov ózi qatysqan 2-shi álem chempıonatynda top jardy. Otandasymyz fınalda (71 kg) taǵy bir ózbekstandyq Saıdjamshıd Djafarovty tize búktirdi. Aldyńǵy jekpe-jekterde Aslanbek Úndistan, Fransııa, Izraıl, Trınıdad jáne Tobago boksshysynan basym túsken.
Nurbek Oralbaı Tashkentte óz salmaǵynda (80 kg) qarsylas shaq keltirmeı taǵy bir márte ánuranymyzdy shyrqatty. Otandasymyz sheshýshi, kóptiń qyzyǵýshylyǵyn týdyrǵan jekpe-jekte Qytaı atynan synǵa túsetin etnıkalyq qazaq Toqtarbek Tańatqandy utty. Osyǵan deıin Nurbek Reseı, Iordanııa, Túrkııa men Ázerbaıjannan kelgen boksshylardan basym túsken.
Fınaldyń alǵashqy kúni Ulttyq quramadaǵy eń jeńil sportshy Sanjar Tashkenbaı top jaryp, chempıon atanǵan eń jas qazaq boksshysyna aınaldy. Al odan keıin sharshy alańǵa shyqqan Dýlat Bekbaýov (67 kg) qarsylasyna jol berip, kúmis medalǵa qol jetkizdi. О́zbekstandaǵy dodaǵa Ulttyq qurama barlyq 13 salmaqta sportshy apardy. Bul qatardaǵy Sáken Bıbosynov (51 kg), Serik Temirjanov (57 kg), Talǵat Syrymbetov (60 kg), Sanatáli Tóltaev (63,5 kg), Nurqanat Raıys (75 kg), Saǵyndyq Toǵambaı (86 kg), Aıbek Oralbaı (92 kg) men Qamshybek Qonqabaev (+92 kg) júldegerler qatarynan kórine almady.
Qazaqstan quramasy Tashkentte 4 altyn, 1 kúmis medaldi qorjynǵa salyp, jalpy esepte 2-oryn aldy. Kósh basynda jarys qojaıyny О́zbekstan qaldy. Jalpy Qazaqstan 1993 jyldan beri egemen el retinde osymen 16 ret álem chempıonatyna bylǵary qolǵap sheberlerin jiberdi. Qazir enshimizde 18 altyn, 16 kúmis, 22 qola júlde bar. Osynyń arqasynda jalpy ÁCh tarıhyndaǵy medal esebinde Qazaqstan AQSh-ty basyp ozyp, 3-orynǵa kóterildi. Birinshi orynǵa - Kýba, ekinshi orynǵa Reseı memleketteri jaıǵasqan. Ulttyq qurama osyǵan deıin tek 2013 jyly Almatyda ótken dúnıejúzi básekesinde 4 altynǵa ıe bolǵan.
«Qurmetti Qazaq eli, bárińizdi shyn júrekten quttyqtaımyn! Bul – búkil eldiń jeńisi! Tashkenttegi osy álem chempıonaty quramamyz úshin erekshe nátıjemen este qaldy. Boksshylarǵa qoldaý kórsetý úshin Qazaqstannan kóp jankúıer kelgenin alǵashqy kúnnen baıqadym. Federasııa men komandanyń atynan olarǵa raqmet aıtamyn», dedi Qazaqstan boks federasııasynyń prezıdenti Keńes Raqyshev fınaldardan keıin bergen suhbatynda.
Taǵy aıta keteıik, álem chempıondary Halyqaralyq boks qaýymdastyǵynan (IBA) 200 myń AQSh dollarynan aldy. Kúmis júldegerlerge 100 myń, qola júldegerlerdiń árqaısysyna 50 myń AQSh dollary berildi. Bıylǵy dodanyń jalpy júlde qory – 5,2 mln AQSh dollary.
Sondaı-aq Qazaqstan boks federasııasynyń prezıdenti Keńes Raqyshev osy nátıjege úles qosqan Myrzaǵalı Aıtjanov bastaǵan bapkerler qosynyn, boksshylardy, dárigerlerdi, ǵylymı toptyń mamandaryn óz esebinen marapattaıdy. Bul rette chempıon atanǵan Ulttyq qurama boksshylaryna syıaqy retinde 100 myń AQSh dollarynan tabystaıdy.