2025 jyly ótetin bokstan kelesi álem chempıonatynyń júlde qory belgili boldy. Eki jyldan keıin álemniń eń úzdik boksshylary 10 mıllıon AQSh dollaryn sarapqa salatyn bolady, dep habarlaıdy Egemen.kz.
Halyqaralyq boks qaýymdastyǵynyń (IBA) basshysy Omar Kremlev 2025 jyly ótetin álem birinshiliginiń júlde qory eki ese ulǵaıatynyn habarlady .
«2025 jylǵy álem chempıonatynyń júlde qory 10 mln dollardy quraıdy. Men óz elińniń namysyn qorǵaý mańyzdy ekenin bilemin, biraq aqsha tabý, ózińniń jáne otbasyńnyń jaǵdaıyn jasap, qamtamasyz etý de mańyzdy. Tashkentte ótken álem chempıonatynda besinshi oryn alǵan boksshylar da marapattalady, olar úsh myń dollardan alady. Al kelesi Álem chempıonatynda besinshi oryn alǵan boksshylar on myńnan alady», dedi IBA basshysy
Onyń aıtýynsha, sportshylardan basqa, olardyń tálimgerleri de aqshalaı syılyqqa ıe bolady.
«Týrnırde júldeli oryn alǵan boksshy alǵan qarajatynyń 10%-yn jattyqtyrýshyǵa berýi tıis. Jattyqtyrýshylar da chempıonattardan aqsha tapqanyn qalaımyn. Meniń mindetim – álem chempıonatyn boksshylar úshin eń mańyzdy týrnırge aınaldyrý. Biz adaldyq pen ashyqtyq úshin kúresemiz», dep qosty Kremlev.
Osy oraıda IBA prezıdenti Halyqaralyq boks federasııasynda bári ashyq bolatynyn atap ótti.
«IBA - boks úıi. Bizde eshqandaı saıasat joq, tek boks bar. Biz boksshylardyń, jattyqtyrýshylardyń jáne Federasııanyń múddelerin qorǵaımyz», dep túıindedi Omar Kremlev.
Aıta ketsek, bokstan kelesi álem chempıonaty Japonııanyń Osaka qalasynda ótedi.