Qostanaıda «Abaı oqýlary» baıqaýynyń oblystyq kezeńi qorytyndylandy. Alty atalym boıynsha ótken bilim jarysyna báıgeniń aýdandyq jáne qalalyq kezeńderinen iriktelip shyqqan 88 oqýshy qatysty.
Dástúrli bilim jarysynyń oblys ortalyǵyndaǵy Abaı mektebinde ótýi de rámizdik mánge ıe. Byltyr óńirde tórt birdeı mektep qazaqtyń bas aqyny Abaı Qunanbaıulynyń esimin ıemdengen. Endi «Abaı oqýlarynyń» oblystyq kezeńi jyl saıyn osy mektepterdiń birinde uıymdastyrylady.
Baıqaýǵa qatysqan oqýshylar Abaıdyń «Qarasózderi» men óleńderin jatqa, al aqyn shákirtteriniń shyǵarmalaryn mánerlep oqýdan jarysqa tústi. Mektep májilishanasynda ótken Abaı ánderiniń saıysyn bólek bir mereke dersiz. Bilim jarysyna jas aqyndar da qatysyp, uly aqynǵa arnaǵan óleńderin oqydy.
Baıqaý qorytyndysyna kelsek, «Júırikten júırik ozar jarysqanda» atty aqyndar saıysynda «Torlasa oı-sanamdy tumandaı kún, Abaıdyń áleminen syr ańdaımyn» dep tolǵaǵan, Y.Altynsarın atyndaǵy daryndy balalarǵa arnalǵan mektep-gımnazııanyń oqýshysy Arman Ámirov ozyp shyqty. Al «Abaıdyń qarasózderi» atalymy boıynsha Arqalyqtaǵy Beıimbet Maılın atyndaǵy mekteptiń 8-synyp oqýshysy Nuraıym Nurbekqyzy jeńimpaz atandy. Abaıdyń aqyn shákirtteriniń shyǵarmalaryn naqyshyna keltirip mánerlep oqýdan da Arqalyq qalasynyń oqýshylary ozyq shyqty. Bul atalymdy Arqalyqtaǵy Shoqan Ýálıhanov atyndaǵy mekteptiń 8-synyp oqýshysy Aqsezim Spanova jeńip aldy. Abaı ánderi boıynsha ótken saıysta Qostanaıdaǵy №15 mekteptiń 9-synyp oqýshysy Arnur Qýandyq aldyna jan salmady.
Bilim basqarmasyna qarasty «Qostanaı daryny» óńirlik oqý-ádistemelik ortalyǵynyń mamany Gúlnár Erǵalıevanyń aıtýynsha, oblystyq baıqaýdyń jeńimpazdary aldaǵy ýaqytta respýblıkalyq Abaı oqýlaryna qatysady.
Qostanaı oblysy