Nurjan Smanov: О́zbekter «kimnen utylsaq ta, qazaqtarǵa ese jibermeýimiz kerek» degen qaǵıdany ustanady

Nurjan Smanov álem chempıonaty qarsańynda BAQ ókilderine: «Jarys ádil ótse, Qazaqstan quramasy tórt altyn alýǵa múmkindigi bar, al eger tóreshiler bura tartatyn bolsa, eki al­tynmen shektelemiz», dep aıtqan edi.

Bul sózin ol kelesideı túsindirdi:

«Meniń osylaı kúmándanýym ne­gizsiz emes. Kezinde ózim de Tashkent tó­­rinde san márte judyryqtastym. Ol jerde jergilikti boksshyny aıqyn basymdyqpen jeńbeseń, jeńisti saǵan bere qoıýy neǵaıbyl. Olar «kimnen utylsaq ta, qazaqtarǵa ese jibermeýimiz kerek», degen qaǵıdany ustanady. Oǵan tań­danatyn túgi joq. Bizdiń de usta­nymyz sondaı.

Kúni keshe ǵana aıaqtalǵan álem chempıonatyn tapjylmaı tamashaladym. Iá, bastapqy kezeńderde biraz bura tartýshylyq boldy. Biraq alǵashqy aınalymdarda utylǵan elimizdiń bylǵary qolǵap sheberlerine kópe-kórineý qııanat jasaldy dep aıta almaımyn. Jeńilgen jigitterimiz kináni ózderinen izdesin. Osyndaı dúbirli dodada jeńis tuǵyryna kóterilý úshin olarǵa áli kóp jumys isteý kerek.

Jartylaı fınal jáne fınaldyq saıystar ádil ótti. Bas júlde úshin ót­ken jekpe-jekterde jeńilis taýyp, kúmis medal ıelengen Dýlat Bekbaýov­tyń (67 kg) ózbekstandyq Asadhoja Mýıdın­hýd­jaevqa áli jetpedi. Al­ǵashqy eki raýndty qandasymyz qar­sy­lasyna berip qoıdy. Tek úshinshi raýnd­ta ǵana Dýlat shıraq qımyldaı bastady. Bir­aq qarsylasyńdy uryp jyqpasań, soń­ǵy raýndta jeńisti julyp alý múmkin emes», dedi Nurjan Smanov. 

Sondaı-aq sheshýshi tusta jeńiske jetken tórt boksshymyzǵa sheksiz alǵysyn bildirdi.

«Barlyǵy da óte keremet óner kór­setti. Oıbek Jýraev pen Saıdjamshıd Ja­farovty óz jerinde tas-talqanyn shy­ǵaryp jeńgen Mahmud Sabyrhan (54 kılo) men Aslanbek Shymbergenovtiń (71 kılo) sheberlik deńgeıi básekelesterinen bir bas joǵary boldy. Sol sebepti tóre­shiler jergilikti boksshylarǵa jaqtasyp, jerlesterimizge «kıligýge» esh ilik tappady. Báseke barysynda Mahmud qarsylasyn eki ret nokdaýnǵa jibergende, shattanbaǵan qazaq joq-aý, sirá! Sanjar Táshkenbaı (48 kılo) men Nurbek Oralbaıdyń da (80 kılo) basymdyǵy anyq baıqaldy. Jas bolsa da jalyndy ári qarymdy jigitter eken. Iá, dál osyndaı ór minezdi órenderi bar Qazaq eli boksy­nyń erteńi úshin esh alańdamaýǵa bolady», dep pikirin bildirdi.

Onyń aıtýynsha, jalpy alǵanda, Tashkenttegi álem chem­pıonatynyń uıymdastyrylý deń­geıi óte joǵary boldy.

«О́zbekter bul jarysqa jan-jaqty jáne tyńǵylyqty daıyndalǵan eken. Osy jaǵy bizdi qýant­ty. Al Myrzaǵalı Aıtjanov jattyq­tyr­ǵan Qazaqstannyń ulttyq qurama koman­dasynyń atalǵan dodadaǵy óneri bas bar­maqpen baǵalaýǵa turarlyq», dedi Nurjan Smanov.