Keshe ótken Kan festıvalinde amerıkalyq aktrısa Natalı Portman 1949-1950 jyldary Krıstıan Dıor óziniń mýzasy bolǵan qazaq qyzy - Alla Elshinge arnap tikken «Junon» kóıleginiń qaıta tigilgen kóshirmesin kıip shyqty, dep habarlaıdy Egemen.kz.
Alla Elshin kıgen bul kóılektiń túpnusqasy Nıý-Iorktegi áıgili Metropolıten mýzeıinde saqtaýly tur.
Qytaıdyń Harbın qalasynda týyp-ósken Alla Elshin ekinshi dúnıejúzilik soǵystan keıin anasymen birge Fransııaǵa kóship ketken. Ákesi Qýanhan Elshin otbasyn Eýropaǵa attandyrýǵa kómektesip, ózi elden shyǵa almaı qalǵan. Onyń ákesiniń taǵdyry áli kúnge deıin belgisiz. Keı málimetterge qaraǵanda, ákesi qýǵyn-súrginge ushyrap ketken. Alla 1989 jyly 62 jasynda dúnıeden ozǵan.
Fransııa astanasy Parıjdi baǵyndyrǵan qazaq qyzyn qalyń elge tanymal etken kitap ta jaryq kórgen. Onyń avtory - jazýshy, dıplomat Berlın Irıshev. Ol óziniń zertteý jumysynyń nátıjesinde tyń derekterge toly «Alla - Shyǵystan shyqqan Dior-dyń marjany» atty týyndysyn usyndy.
Alla Elshinniń Eýropada eshkimge uqsamaıtyn model ǵana emes, zor tulǵa ekendigin Krıstıan Dıordyń ózi de moıyndaǵan. Alla ıyǵyna ilgen sán úlgisin ertesine-aq Elızabet Teılor, Marlen Dıtrıh syndy álemdik kınematorgrafııanyń sańlaqtary, tipti Eýropa hanshaıymdary da kıip shyqqan.