Elordada «Astana Venture Club»-tyń bolashaǵy zor tehnologııalyq kásipkerlerge ınvestısııa quıyp, qoldaý kórsetetin «bıznes-perishte» qaýymdastyǵynyń resmı ashylýy ótti. Oǵan ınvestorlar, bıznes-qaýymdastyqtardyń jetekshileri, venchýrlyq jáne ınvestısııa salasynyń mamandary, mesenattar men elimizdegi IT-qaýymdastyqtyń ókilderi qatysty.
Klýbtyń mıssııasy – «Astana Hub» bazasynda venchýrlyq ınvestısııa mádenıeti men ekojúıeni damytý. Bul qarjylyq áleýetin arttyrǵysy keletin otandyq kásipkerlerdi balamaly ınvestısııalyq múmkindikpen tanystyrý maqsatynda qurylǵan.
«Elimizdegi «bıznes-perishtelerdi» qaýymdastyqtyń bir bóligi bolýǵa shaqyramyz. Bul – memleketimizdegi jáne sheteldik áleýetti jobalarǵa ınvestısııa salý arqyly ınvestısııalyq portfelin keńeıtýge umtylǵandarǵa tamasha múmkindik. Platformamyzda isker «perishteler» ózderiniń ınvestısııasyn barynsha ulǵaıtýǵa eń jaqsy ınvestısııalyq strategııa men tásilderdi úırenip, álemniń ár túkpirinen kelgen áriptesterimen bilim men tájirıbe almasady», deıdi «Astana Venture Club» negizin qalaýshy ári jetekshisi Nurasyl Jarbasov.
Kirisi men qarqyny joǵary áleýetti startaptardy anyqtap, ony ınvestısııalaý maqsatynda qurylǵan klýb ınvestorlar, keńesshiler, sarapshylar men tálimgerler úshin ózara kómek pen qoldaý ortasyn qalyptastyrýǵa kúsh salmaq.
«Tamasha ıdeıalardy júzege asyrý úshin jobanyń áleýetin baǵamdaı alatyn «bıznes-perishte» qajet. Sondyqtan venchýrlyq ekojúıe úshin startaptar men korporasııalar ǵana emes, ınvestorlar da asa mańyzdy. Bul – basty máseleniń biri. О́ıtkeni onsyz eshqandaı damý, naryqty jańǵyrta alatyn jańa sheshim jáne ınnovasııalar men kompanııalar da bolmaıdy. Bir sózben aıtqanda, ınvestorlar klýbyn qurý eldiń venchýrlyq ekojúıesin damytý jolyndaǵy mańyzdy qadam», dedi «INVESTORO» halyqaralyq ınvestorlar uıymynyń prezıdenti Vıtalıı Polehın.
«Astana Venture Club» qyzmeti áleýetti ınvestorlardan «bıznes-perishteler» pýlyn qurýǵa, halyqaralyq deńgeıde bıznestiń jańa múmkindikterin izdeýge, jelini damytýǵa, kompanııalardyń portfolıosyn qoldaýǵa, tájirıbe almasýǵa, aýyrtpalyqtardy birge kóterýge, ınvestısııalyq tabysty arttyrýǵa baǵyttalǵan.
«Venchýrlyq kapıtal naryǵyn damytýǵa baǵyttalǵan «Astana Venture Club»-tyń maqsaty «Astana Hub» mindetterimen sáıkes keledi. Sondyqtan bizdiń tehnopark «bıznes-perishtelerge» venchýrlyq ınvestısııa álemine ený múmkindigin usynatyn jáne ınnovasııalyq sheshimderin engizýde daryndy IT-kásipkerlerge qoldaý kórsetetin qoǵamdastyq qurý bastamasyn tolyǵymen qoldaıdy», deıdi «Astana Hub» halyqaralyq tehnoparkiniń basqarýshy dırektory Abaı Ábsamet.
Jaqynda «bıznes-perishteler» mektebiniń alǵashqy tegin ıterasııasy ótedi. Sondaı-aq klýb aıasynda turaqty túrde ártúrli is-shara, sonyń ishinde myqty sarapshylardyń qatysýymen startaptardyń pıtchıngi uıymdastyrylady.