Parlament Senatynda Máýlen Áshimbaev Jergilikti ókildi organdarmen ózara is-qımyl jasaý jónindegi keńesti ótkizdi. Basqosý barysynda senatorlar men máslıhat depýtattary Memleket basshysynyń tapsyrmalarynan týyndaıtyn mindetterdi talqylap, aldaǵy birlesken jumystyń basym baǵyttaryn aıqyndady.
Tóraǵa Máýlen Áshimbaev el Prezıdenti Qasym-Jomart Toqaev belgilep bergen mindetterdi júıeli túrde iske asyrý jolynda kúsh biriktirýdiń mańyzdy ekenine nazar aýdardy. Sondaı-aq ol aldaǵy birlesken jumystyń birqatar basym baǵytyna toqtalyp ótti. Máýlen Áshimbaevtyń aıtýynsha, qazir jańa formasııadaǵy zańdardy qabyldaý isine máslıhat depýtattaryn tartýdyń mańyzy zor. Al senatorlar óńirlerdi damytý máselelerin, atap aıtqanda, jergilikti ınfraqurylymnyń erekshelikteri men jaǵdaıyn jan-jaqty zerdelep, qordalanǵan problemalardy júıeli túrde sheshýge yqpal etýge tıis.
Sonymen qatar Senat spıkeri máslıhattardyń jergilikti memlekettik basqarý men ózin ózi basqarýdy damytýdaǵy róli týraly aıtty. Qoldanystaǵy zańnamaǵa engizilgen ózgeristerdiń nátıjesinde qazir fýnksııalardyń bir bóligi ortalyqtan óńirlerge berilgeni belgili.
«Depýtattardyń jergilikti jerlerde reformalardyń iske asyrylý barysyna josparly túrde monıtorıng júrgizýin qolǵa alý mańyzdy. Qazirgi tańda basqarý júıesin ortalyqsyzdandyrý máselesine úlken mán berilip otyr. Osy baǵytta júrgizilgen ákimshilik reformalardyń nátıjesinde Úkimettiń 500-ge jýyq fýnksııasy ortalyq memlekettik organdarǵa berildi. Endigi kezeńde birshama quzyretter jergilikti jerlerge beriledi. Aldaǵy aılarda tıisti zańdardy qabyldaýdy josparlap otyrmyz. Osyǵan baılanysty máslıhattardyń rólin odan ári arttyrý máselesin qarastyrǵan jón. Ákimshilik ózgeristerdiń osyndaı jańa kezeńi jergilikti ókildi organdardyń quzyretin keńeıtýge de jol ashýy qajet», dedi Palata tóraǵasy.
Sondaı-aq Máýlen Áshimbaev óńirlerdiń múddesin qoǵaıtyn Palata retinde Senat máslıhattarmen ózara baılanysty ári qaraı arttyra túsetinin aıtty. Osy baǵytta «О́ńir» depýtattyq tobynyń quramy jańartyldy. Odan bólek, Jergilikti ókildi organdarmen ózara is-qımyl jasaý jónindegi keńestiń qyzmeti qaıta qurylyp, aldaǵy maqsat-mindeti naqtylandy. Keńestiń quramy ózgerip, oǵan barlyq máslıhat tóraǵalary múshe bolǵanyn da atap ótken jón.
«Qaıta jańartylǵan máslıhattarmen ózara is-qımyl jónindegi keńes aldaǵy ýaqytta óńirlik damýdyń jáne osy saladaǵy zańnamany jetildirýdiń ózekti máselelerin talqylaıtyn mańyzdy alańǵa aınalýǵa tıis. Osy rette halyqpen tıimdi keri baılanysty qamtamasyz etýge erekshe nazar aýdarý kerek. Senat jergilikti ókildi organdardyń usynystaryn qaraýǵa jáne olardy iske asyrýǵa yqpal etýge daıyn. Sondaı-aq qabyldanǵan zańdar men baǵdarlamalardyń mánin azamattarǵa túsindirip, jetkizýdiń de mańyzy zor. Bul da keńestiń strategııalyq mindetteriniń biri bolýy qajet. Osylaısha, bárimiz birlesip, Memleket basshysy belgilep bergen óńirlerdi jan-jaqty damytý jónindegi mindetterdi tabysty iske asyramyz dep senemin», dedi Máýlen Áshimbaev.
Otyrys barysynda qatysýshylar máslıhattarǵa ádistemelik kómek kórsetý, osy baǵytta jergilikti ókildi organ depýtattaryna arnalǵan turaqty semınarlar men trenıngter uıymdastyrý jáne tájirıbe almasý máselelerin de qarady. Sondaı-aq máslıhat tóraǵalary Palatanyń turaqty komıtetteriniń múshelerimen kezdesip, óńirlerdegi túrli mańyzdy máselelerdi talqylady.