Oqý-aǵartý mınıstrligi Almaty oblysyndaǵy mektepterdiń birinde dene shynyqtyrý muǵalimi tarapynan kámeletke tolmaǵandardy zorlaý áreketine qatysty túsinikteme berdi, dep habarlaıdy Egemen.kz.
Jýrnalıster Oqý-aǵartý mınıstri Ǵanı Beısembaevtan14 jastaǵy oqýshyny zorlamaq bolǵan 53 jastaǵy dene shynyqtyrý muǵalimine qatysty tergeý amaldary jaıly surady. Bul oqıǵa áleýmettik jeli qoldanýshylary arasynda qyzý talqylanǵan edi.
Mınıstrdiń aıtýynsha, atalǵan iske qatysty tergeý amaldary onyń jeke baqylaýyna alynǵan. Sondaı-aq bul isti mınıstrlikke qarasty Balalardyń quqyqtaryn qorǵaý komıtetiniń basshysy Nasymjan Ospanova qadaǵalaıtyny qosa aıtyldy.
«Bul jaǵdaı erekshe baqylaýǵa alyndy. Muǵalim jumystan shettetildi, qazirgi ýaqytta tergeý júrgizilýde. Bul is Ishki ister mınıstrliginiń baqylaýyna da alynǵan», dedi Nasymjan Ospanova.
Onyń aıtýynsha, tergeý quqyqtyq salada júrip jatyr, muǵalimdi jumystan shyǵarý máselesin sot sheshetin bolady.
«Eń bastysy – ol balalardan oqshaýlandy», dedi vedomstvo basshysy Ǵanı Beısembaev.
Eske sala ketsek, Almaty oblysyndaǵy aýyldardyń birinde 14 jastaǵy mektep oqýshysy 53 jastaǵy dene shynyqtyrý páni muǵaliminiń ústinen shaǵymdanǵan. Qyzdyń aıtýynsha, muǵalim qyzdy jumys kabınetine kirgizip tıisken.