Prezıdent Qasym-Jomart Toqaev Joǵary Eýrazııalyq ekonomıkalyq keńestiń keńeıtilgen quramdaǵy otyrysynda eýrazııalyq ıntegrasııanyń alǵashqy 10 jyldyǵy týraly baıandama ázirleýdi usyndy, dep habarlaıdy Egemen.kz Aqordanyń baspasóz qyzmetine silteme jasap.
«Kelesi jyly bizdiń birlestikke 10 jyl tolady. Biz EAEO-nyń mereıtoılyq sammıtine jınalamyz. Bul mańyzdy oqıǵa júrip ótken jolymyzdy egjeı-tegjeıli saralap, odaqtyń ári qaraıǵy strategııalyq keleshegin anyqtaýǵa jaqsy sebep bolýy kerek dep sanaımyn», dedi Memleket basshysy.
Sonymen qatar Prezıdent eýrazııalyq ıntegrasııanyń alǵashqy 10 jyldyq qorytyndylaryn qujatpen qattaýdy usyndy.
«Osyǵan baılanysty komıssııaǵa Joǵary keńestiń kelesi otyrysyna eýrazııalyq ıntegrasııanyń birinshi kezeńi týraly baıandama daıyndaýdy tapsyrýdy usynamyn. Onda negizgi qorytyndylar men jetistikter, sondaı-aq ári qaraıǵy ıntegrasııalyq damý baǵytyndaǵy naqty usynystar kórsetilýi kerek», dedi ol.