Almaty qalasy Medeý aýdanynyń №2 aýdandyq sotynda emhana qyzmetkerlerine qatysty asa iri kólemde múlik jymqyrdy degen aıyppen qylmystyq is qaraldy, dep habarlaıdy Egemen.kz.
Sot anyqtaǵandaı 2015 jylǵy sáýir – 2022 jylǵy naýryz aralyǵynda emhananyń bas dárigeri K. memlekettik fýnksııalardy oryndaýǵa ýákiletti tulǵa bola otyryp, bas býhgalter N. jáne kadrlar bóliminiń ınspektory S.-men aldyn ala qylmystyq kelisim ornatyp, is júzinde jumys istemeıtin 19 tulǵany qyzmetke taǵaıyndaý týraly buıryqtardy rásimdeý jónindegi is-áreketterge basshylyq etken.
Resmı túrde rásimdelgen qyzmetkerlerdiń shottaryna aı saıyn eńbekaqy eseptep, aýdaryp otyrǵan, keıinnen ony óz menshigine aınaldyryp, óz qajettilikterine jumsaǵan.
Aıyptalýshylar quqyqqa qaıshy áreketteri arqyly memleketke 79 mln teńgeden astam shyǵyn keltirgen.
Sot jaza taǵaıyndaý kezinde jasalǵan qylmystyń sıpaty men qoǵamdyq qaýiptilik dárejesin, kinálilerdiń jeke basyn, onyń ishinde olardyń qylmys jasaǵanǵa deıingi jáne odan keıingi minez qulyqtaryn eskerdi. Sottylyqtyń bolmaýy, S., N.-niń zalaldy ishinara óteýi sekildi jeńildetetin jaǵdaılar da eskerildi.Zalaldy óteý sharalaryn eskere otyryp, eki tulǵa 7 jyl merzimge shartty túrde bas bostandyǵynan aıyryldy, S.-ǵa 5 jyl merzimge materıaldyq-jaýapty laýazymdardy atqarý quqyǵynan aıyrý túrinde qosymsha jaza taǵaıyndaldy, N. 5 jyl merzimge býhgalterlik qyzmetpen aınalysý quqyǵynan aıyryldy.
Sot bas dáriger K.-ǵa 7 jyl merzimge bas bostandyǵynan aıyrý jazasyn taǵaıyndady, ol orta qaýipsizdik QAJ mekemesinde jazasyn óteıtin bolady, sondaı-aq memlekettik qyzmette qyzmet atqarý quqyǵynan ómir boıyna aıyryldy.
Sot úkimi zańdy kúshine engen joq.