Kitap oqý – mı jattyǵýy. Kitappen dostasqan adam aqyly tolysyp, parasatty bola túsedi. Ári óz oıyn naqty, ashyq aıta alatyn bolady. Kitapty kóp oqý oılaý júıemizdiń jaqsarýyna, qııalymyzdyń damýyna, sonymen qosa sózdik qorymyzdyń artýyna ózindik yqpal etedi.
Ǵalymdardyń aıtýynsha, kitapty jyldam oqyǵanda kóz kóp sharmaıdy eken. Al adamdardyń 95 paıyzy kitapty óte baıaý oqıdy. Bar bolǵany mınýtyna 180-200 sóz. Kitapty asyqpaı oqyǵanda adam oqyǵanynyń 60 paıyzyn túsinse, jyldam oqyǵanda 80 paıyzyn túsinedi. Kitap oqý kezinde oqyrmannyń kózderi ár áripti jeke sýret retinde kórsetedi, al mı olardy bir sýretke biriktiredi eken.
Sondaı-aq kitap árbir adamnyń boıyndaǵy shyǵarmashylyq qabiletti oıatady. Sol sebepti oqyrman kitapqa degen mahabbatyn, qyzyǵýshylyǵyn joǵaltyp almas úshin birneshe keńes usynamyz.
1)Kitap oqýdy ádetke aınaldyrý
Kúnine kitap oqýǵa 1 saǵat arnaý qajet, al ýaqytyńyz bolmasa keminde 15 mınýt oqý kerek. Sonda mıyńyz tynyǵyp, sergip qalasyz jáne sizdiń tulǵalyq damýyńyzǵa úlken áser etedi.
2)Kitapty durys tańdaý
Eń aldymen kitapty jas ereksheligine qaraı tańdaǵan jón. Oqý barysynda júıelikke asa mán bergen abzal. Bastaýysh synyp oqýshylary balalar ádebıetin, ertegi kitaptardy oqymaı turyp «Abaı joly» nemese «Kóshpendiler» sekildi kólemdi ári aýyr kitaptardy oqysa, ony tolyqtaı túsinip, ózine kerek dúnıeni ala almaıdy. Sol sekildi jasóspirim shaǵynda «Mahabbat qyzyq mol jyldardy» oqymaǵan adam, jasy ulǵaıǵannan keıin qansha talpynsa da romannyń qyzyǵyna bata almaıdy.
3) Negizgi oılardy túrtip alý
Kitaptaǵy ózińizge qajetti jerlerin jazyp alý sizge paıdasyn tıgizedi. Naqyl sózder nemese qanatty sózderdi jazý arqyly sizde jańa oılar týyndaıdy, ómirge degen kózqarasyńyz ózgeredi jáne kitap oqýǵa degen qulshynysyńyz arta túsedi.
4) Taldaý jasaý
Kitapty oqyp bitkennen keıin óz oıyńyzdy jazyp otyryńyz. Iаǵnı kitaptan túsingenińizdi, ne túıgenińizdi baıandaý. Oqyǵan kitaptan tájirıbe jınap, ózimizge qajet qundylyqtardy alý qajet. Osy keńesterdi paıdalana otyryp kitaptyń qanshalyqty paıdaly bolǵanyn bile alamyz.
5) Bólisý
Kitapty oqyp bolǵannan keıin ony dostaryńyzǵa, jaqyndaryńyzǵa usynǵan jaqsy. Kitap týraly pikir almasyp, talqylaý oqyǵanyńyzdy este saqtaýǵa kómektesedi.
Saıajan QUDAIBERGEN,
L.N. Gýmılev atyndaǵy EUÝ stýdenti.