Osydan bir jarym aı buryn Qarasý aýylynda ashylǵan qymyzhana búginde búkil Torǵaı óńirine belgili demalys ornyna aınaldy desek artyq emes. Bıyl bıe baılanǵaly, shalǵaı aýyldyń mańynda, kúre joldyń boıynda turǵan qos kıiz úıdiń aldy qonaqtan qurǵap kórgen emes. Tipti biraz jurt Arqalyq, Amangeldiden arnaıy kelip, osy jerde shaǵyn toı-tomalaqtaryn ótkizip ketedi.
Qostanaıdan Torǵaıǵa jolaýshylap shyqqan adam Áýlıekólden ári qaraı Amantoǵaıǵa deıin shamamen 260 shaqyrymdaı jol júredi. Osy eki aralyqta jolaı soǵyp, az-kem aıaldap, tynyǵyp, júrek jalǵap alatyn dámhana joq. Al Amantoǵaıdaǵy jalǵyz dámhana qas qaraımaı turyp jabylyp qalady.
Joqtyń ornyn toltyrǵandaı bolǵan jol boıyndaǵy dámhanaǵa ári-beri aǵylyp jatqan jolaýshylar da jıi túsedi. Qymyzhanany eki jigit ashypty. Ekeýi de Qarasý aýylynda turady. Ekeýiniń de esimderi – Elaman.
– Jol boıynda ashanaǵa suranys bar. Sondyqtan dosym ekeýmiz aqyldasa kelip, otbasymyzben birigip bir qymyzhana ashý týraly sheshimge keldik. Sáýirden beri jumys istep jatyr. Aspazymyz da, ákimshimiz de – kelinshekterimiz. Biz syrtqy sharýalardy istep, suraǵandaryn ákep berip turamyz. Osydan eki jyl buryn jeke kásip ashyp, memleketten 500 myń teńge kóleminde qaıtarymsyz qarjylaı kómek alǵanmyn. Sóıtip, dóner jasaı bastadym. Biraq jalǵa alǵan ǵımaratym durys bolmaı, isim ónińkiremedi. Sodan Elaman eki kıiz úı satyp alyp, birigip qymyzhana ashaıyq degen usynys aıtty. Qazir kelýshilerdiń qalaýy boıynsha kez kelgen taǵamdy pisire beremiz. Dóner, pıssa, káýap, qymyz, quımaq, maı, baýyrsaq – bári bar. Tapsyrys boıynsha buqpa pisirip, et asyp beremiz. Máselen, 7 mamyrda 3-4 kún qatarynan eki kıiz úı bosamaı qaldy. Áıel adamdar er azamattarǵa merekelik dastarqan jasady. Mektep bitirýshilerden de tapsyrystar túsip jatyr, – deıdi qymyzhananyń ıesi Elaman Saǵymbaı.
Anadaı jerde bir-eki jylqy, árirekte jalǵyz qara esek jaıylyp júr eken. Bul janýarlar da osy qymyzhanaǵa qyzmet etetin bolyp shyqty. Balalar qazaqy shapan kıip esekke minip qyzyqtaıdy. О́ıtkeni esek maly bul óńirde kóp kezdese bermeıdi. Batyrdyń kıimin kıip, at minip, sýretke túsýge de bolady. Kıiz úıdiń artynda sadaq tartyp, nysana kózdeıtin alań da bar.
Kásip ıeleri on shaqty bıe baılap otyr. Munyń syrtynda, jıyrma shaqty sıyr saýyp, sútinen qurt, sary maı, irimshik aıyryp otyr. Bıe men saýyn sıyr arnaıy apparatpen saýylady. «Rahat eken. 8-synyp oqıtyn inim men kelinshegim ózderi saýa beredi. Jolshybaı toqtaǵan kisilerge qaımaq, sary maı, qymyz satamyz. Qazir kóbine, sary maı men bal qymyz ótip tur», deıdi Elaman.
Qostanaı oblysy,
Amangeldi aýdany