Ulytaý oblysy Jańaarqa aýdanynyń 32 jastaǵy turǵyny polısııa qyzmetkerlerine Nambý tapanshasyn tapsyrdy, dep habarlaıdy Egemen.kz.
Jańaarqa aýdanynyń turǵyny Ersin Tájmaǵanbetov jertólede qurylys jumystaryn júrgizý kezinde jerge kómilgen tapanshaǵa uqsas zatty taýyp alǵan.
Aýdan turǵyny birden polısııaǵa habarlasyp, tabylǵan zatty ótkizgen. Oblystyq polısııa departamentiniń jedel-krımınalısteriniń sarapshylary júrgizgen zertteý barysynda bul qarýdyń bir ǵasyrǵa jýyq tarıhy bar ekeni belgili boldy.
Polıseıler qarýdy tapsyrǵan azamatqa alǵysyn aıtty. Tabylǵan tapansha tarıhı jádiger retinde aldaǵy ýaqytta oblystyq mýzeıge tapsyrylady.
Aıta keteıik, Nambý 14 tapanshasy 1925 jyly Nambýdyń 4 tıp tapanshasynyń dızaıny negizinde jasalǵan Japon tapanshasy. Nambý tapanshalary 1920-1940 jyldardaǵy Japon ımperatorlyq armııasynyń negizgi jeke qarýy bolǵan, olar Ekinshi dúnıejúzilik soǵys aıaqtalǵanǵa deıin shyǵaryldy.