Keıingi jyldary elimizdiń ár jas sanatyndaǵy tennısshileri birqatar halyqaralyq týrnırge qatysyp, birinen soń biri jeńis tuǵyryna kóterile bastady. Máselen, jasóspirimder arasynda baq synap júrgen Zańǵar Nurlanuly jýyrda ǵana Erevandaǵy ITF Juniors J30 týrnırinde top jarsa, birer jyl buryn ǵana eresekter básekesine aýysqan Jibek Qulambaeva sáýir aıynda Túrkııadaǵy ITF jarysynda jeńimpaz atandy. Al kúni keshe erler arasyndaǵy el tennısiniń kóshbasshysy Aleksandr Býblık karerasynda alǵash ret ATP 500 sanatyndaǵy týrnırdiń jeńimpazy atanyp, elimizdegi tennıs jankúıerlerine úlken qýanysh syılady.
Germanııanyń Galle qalasynda uıymdastyrylǵan «Terra Wortmann Open» jarysynyń fınalynda Aleksandr Býblık ATP sanatyndaǵy 17 jarystyń jeńimpazy, Tokıo Olımpıadasynyń chempıony, álemniń 7-raketkasy 25 jastaǵy reseılik Andreı Rýblevpen bas júldeni sarapqa saldy. Osyǵan deıin Aleksandr jeti ret ATP jarystarynyń fınalyna shyqsa da, sonyń tek bireýinde ǵana jeńiske jetken bolatyn. Otandasymyz byltyr Monpeledegi ATP 250 týrnırinde dara shyqty. Endi, mine, bıyl alǵash ret ATP 500 deńgeıinde fınalǵa shyǵyp, birinshi umtylysynda-aq chempıondyq ataqqa qol jetkizdi.
Andreı Rýblevtiń esimi barsha tennıs jankúıerlerimen qatar, Aleksandr Býblıktiń ózine de jaqsy tanys. Bozbala shaǵynan bastap ekeýi tennıs sportynyń álippesin birge úırenip, talaı márte kortta sheberlik baıqasqan. Bir-biriniń qyr-syryn óte jaqsy biledi. Eresekter jarysynda da olar búginge deıin tórt márte kezdesip, sonyń úsheýinde Rýblevtiń, bireýinde Býblıktiń baǵy janǵan. Keshegi matchtan keıin eki tennısshi arasyndaǵy jeke esep 3:2-ge deıin qysqardy.
Galledegi ortalyq kortta ótken fınaldyq matchty Aleksandr «á» degennen breıkpen bastap, sol basymdyǵyn birinshi partııanyń sońyna deıin saqtap qaldy – 6:3. Ekinshi partııada esep 3:2 bolǵan mezette reseılik sportshy breık jasap, 4:2 esebimen alǵa uzap ketti. Keıingi geımderde Býblık ese qaıtarýǵa tyrysqanymen, Rýblev toǵyzynshy geımde ekinshi partııany óz paıdasyna aıaqtady – 6:3. Eki setten keıin tarazy basy teńesken soń, bar másele úshinshi partııada sheshildi. Býblık sońǵy setti de breıkpen bastady. Ekinshi geımde otandasymyz úsh breıkpoınttyń úshinshisin tıimdi paıdalanyp, 2:0 esebimen oıyndaǵy basymdyqty ózine aýdardy. Al dopty matchqa qosqan toǵyzynshy geımde Býblık úsh márte qos qatelik jasap, qarsylasyna breıkpoınt jasaýǵa múmkindik berip qoıǵanymen, sońǵy sátte oıyn tizginin óz qolyna alyp, 6:3 esebimen qarsylasyn qapy qaldyrdy. 1 saǵat 36 mınýtqa jalǵasqan matchta Býblık 21 eıs jasap, 6 breık-poınttyń ekeýin paıdalandy. Osylaısha, 26 jastaǵy Aleksandr Býblık óziniń sporttyq jolynda alǵash ret ATP 500 dodasynyń chempıony atandy.
Jerlesimizdiń tamasha jeńisinen keıin Qazaqstan tennıs federasııasynyń prezıdenti Bolat О́temuratov Aleksandr Býblıkti jetistigimen quttyqtap, onyń tabysyna qatysty pikir bildirdi. «Aleksandr Býblıkti tennıs mansabyndaǵy kezekti qadamymen – ATR-500-degi birinshi tıtýlymen quttyqtaımyn. Sasha ózi úshin jáne elimizde tennıstiń damýy úshin úlken jeńiske qol jetkizip, jas urpaqqa úlgi kórsetti. Fınalǵa barar jolda myqty qarsylastardy utty. Al fınalda bar kúshin salyp, álemniń 7-raketkasy Andreı Rýblevti jeńdi. Erler quramasynyń kóshbasshysyna jańa tabystar tileımin!», dedi B.О́temuratov.
A.Býblık Galledegi týrnırde birqatar myqty tennısshini jarys jolynan yǵystyrdy. Atap aıtar bolsaq, birinshi kezeńde ol ATP sanatyndaǵy úsh týrnırdiń jeńimpazy jáne Horvatııa quramasymen birge Devıs kýboginde top jarǵan álemdik reıtıngte 14-orynda turǵan horvatııalyq Borna Chorıchti eki sette 6:3, 6:1 esebimen jeńse, ekinshi aınalymda germanııalyq Iаn-Lennard Shtrýfften basym tústi – 6:3, 6:7, 6:3. Al shırek fınalda álemniń 8-raketkasy ıtalııalyq Iаnnık Sınnerdi (7:5, 2:0), jartylaı fınalda Tokıo Olımpıadasynyń chempıony, AQSh ashyq chempıonatynyń fınalısi germanııalyq Aleksandr Zverevti (6:3, 7:5) qapy qaldyryp, fınalǵa joldama aldy.
Elimizdiń birinshi raketkasy bul jeńisinen keıin Kásibı tennısshiler qaýymdastyǵynyń (ATP) dúısenbi kúni jańartqan reıtınginde 22 satyǵa joǵarylap, 48-den 26-orynǵa bir-aq kóterildi. Bul – Býblıktiń álemdik reıtıngtegi jeke rekordy.