Arqalyq qalasynda ótken «Dombyranyń kúmbiri – bar qazaqtyń birligi» atty merekelik is-sharada bir mezette 1500 dombyrashy kúı tartty.
Ulttyq dombyra kúnine oraı, qalanyń ortalyq stadıonynda arnaıy sahna qurylyp, aq shańqan kıiz úıler tigildi. Al qatarynan 7 kúı oryndap, qala turǵyndarynyń ystyq yqylasyna bólengen myń jarym dombyrashynyń ishinde ár salada eńbek etip júrgen jumysshylar, mamandar, stýdentter men mektep oqýshylary bar.
Myń jarym adamdyq orkestrdiń eń jas múshesi – 7 jasar Aızere Sahan. Al eń qart dombyrashy – búginde jasy toqsanǵa aıaq basqan Arqalyqtyń qurmetti azamaty Kákı Aqan aqsaqal. Merekelik orkestrdiń quramynda bir ǵana Bóltirikovter áýletinen otyz adam óner kórsetkenin de aıta ketý kerek.
Is-shara barysynda ónerpazdardyń kıimin, aspabyn alyp berip, demeýshilik jasaǵan mesenattarǵa qurmet kórsetildi.
Eń qyzyǵy, merekede óner kórsetken 1500 dombyrashynyń 70 paıyzy buǵan deıin dombyra tartyp kórmegen bolyp shyqty. Olar ulttyq aspapty dombyra kúnine daıyndyq barysynda úırenipti.
Arqalyq keshin kúmbirimen terbegen kúı kerýeni taıaýda ǵana ótken «Dombyra – dýman» aımaqtyq dombyrashylar baıqaýynyń gala-konsertine ulasty. Is-sharanyń sońynda Arqalyqqa arnaıy shaqyrylǵan Qýandyq Rahym, Shaharızat Seıdahmet, Dınara Jańabergenova syndy estrada ánshileri án shyrqady.
Qostanaı oblysy