Majarstannyń Pomaz qalasynda uıymdastyrylǵan at ústinde sadaq atý sportynan (jamby atý) Álem kýbogi jarysy aıaqtaldy. Quralaıdy kózge atqan mergender dodasyna Eýropanyń jıyrmaǵa jýyq elinen jáne Qazaqstannan barǵan júzge jýyq sportshy qatysty.
Jamby atý boıynsha elimizdiń ulttyq quramasy jalpykomandalyq esepte top jaryp, bas júldeni jeńip aldy. Atalǵan halyqaralyq dodada el namysyn Eralhan Aıkóz, Baqdáýlet Babajan, Batyr Beksaýyt, Madııar Sháripbaev syndy mergender qorǵady.
Sondaı-aq at ústinde sadaq atý óneri joǵary dárejede damyǵan Germanııa, Fransııa, Fınlıandııa, Italııa, Portýgalııa, Majarstan sııaqty elderdiń mergenderin tańǵaldyrǵan jerlesterimiz «Koreı» stıli boıynsha (at ústinde sadaq atýda eń qıyn stıl túri) ótken saıysta da úzdik shyqty. Atap aıtar bolsaq, Eralhan Aıkóz – altyn, Batyr Beksaýyt kúmis medal aldy. Al «ańshylyq trek» nysanasy boıynsha Madııar Sháripbaev kúmis júldeni enshiledi.