12 jastaǵy Janel Álı Ispanııada ótip jatqan «La Voz Kids» (bala daýsy) baıqaýynyń fınalyna ótti. «La Voz Kids» – jergilikti ıspan telearnasynda kórsetiletin balalar baıqaýy.
Ult mádenıeti – ádebıet pen óneri arqyly tanylady. Máselen, Dımash arqyly qazaqty álem tanyǵany daýsyz. Shetel sahnasynda án shyrqap Qazaqstannyń atyn tanytyp júrgen kishkentaı talanttar da bar. Sonyń biri – Ispanııada «La Voz Kids» baıqaýynda fınalǵa shyqqan Janel Álı.
Qazaqstan atynan qatysqan ánshi áýeli «Kórmeı tyńdaý» kezeńinde tóreshilerdi tańǵaldyryp, ataqty Rosarıo Florestiń (Rosario Flores) tobyna qabyldandy. Birinshi kezeńde Krıstına Agıleranyń «Hurt» kompozısııasyn shyrqaǵan Janeldiń oryndaý sheberligine joǵary baǵa berildi. Odan keıingi «Jekpe-jek» kezeńinde úsh ánshi birge án shyrqap, kelesi aınalymǵa ótý úshin baq synasqan bolatyn. Olar Ýıtnı Hıýstonnyń «I have nothing» ánin aıtty. Joldama Janelge buıyrdy.
Jartylaı fınalda da ánshi sátti óner kórsetti. Jobanyń sharty boıynsha aqtyq synǵa tek eki qatysýshy óte alady. Birin jetekshi tańdasa, birin zalda otyrǵan kórermen tańdaıdy. Taǵy da Krıstına Agıleranyń ánin oryndaǵan Janel kópshiliktiń kóńilinen shyǵyp, kórermen daýsy boıynsha fınalǵa ótti.
«Sahnaǵa shyqqansha qatty qobaljydyq. Biraq, kórermen qyzymdy óte jyly qabyldady. Qoldap jatqandardyń bárine alǵys bildiremin. Endi Janeldiń aldynda aqtyq kezeń tur. Apta ishinde jańa ándi jattap, naqyshyna keltirip aıtý úshin ábden daıyndalýy kerek. Al jobanyń jeńimpazy keler aptada belgili bolady. Biraq, biz úshin kóp qatysýshynyń ishinen fınalǵa deıin jetýdiń ózi – úlken jeńis», deıdi anasy Gúlshahar Batyrsha.