Parıjde alaýy tutanatyn Jazǵy Olımpııa oıyndarynyń bastalýyna da bir jyldan sál asa ýaqyt qaldy. Qazir Olımpıada baǵdarlamasyna engen birqatar sport túrinen joldamalar sarapqa salynyp jatsa, keı sport túrinen lısenzııalar endi taratyla bastaıdy. Máselen, kúni keshe Halyqaralyq kúres federasııasy (UWW) 2024 jylǵy Parıj Olımpıadasynyń joldamalary sarapqa salynatyn beldesýler qaı qalalarda ótetinin málimdedi. Iаǵnı Olımpıadaǵa deıingi balýandar básekesiniń irikteýi úsh kezeńge jalǵasyp, álemniń úsh qalasynda uıymdastyrylady.
Olımpıadaǵa irikteý jarystarynyń alǵashqysy osy jyldyń 16-24 qyrkúıegi kúnderi Serbııa astanasy Belgradta ótetin álem chempıonaty bolmaq. Kúzdegi jahandyq dodada Olımpııa oıyndarynyń baǵdarlamasyna enetin ár salmaqta 5 lısenzııa sarapqa salynady. Munda qola medal jolynda jeńilgen eki balýan ózara kúresip, 5-joldamaǵa ıelik etedi. Serbııada jalpy sany 90 balýan joldama ıegeri atanady.
Al keıingi eki kezeń 2024 jylǵa josparlanǵan. Onyń alǵashqysy sáýir aıynda ótetin qurlyqtyq irikteý jarystary bolsa, sońǵysy Ystanbul qalasyndaǵy sheshýshi irikteý týrnıri. Máselen, Azııa qurlyǵynyń irikteý jarystary 19-21 sáýir kúnderi Qyrǵyzstannyń Bishkek qalasynda ótedi. Sportty damytý dıreksııasynyń málimeti boıynsha, munda ár salmaqta fınalǵa shyqqan eki balýan ǵana Parıj joldamasyn qorjynǵa salady. Panamerıka chempıonaty men sol qurlyqtaǵy irikteý dodasyn Akapýlko (Meksıka) qalasy qabyldaıdy. Sonymen qatar Afrıka men Tynyq muhıty aımaǵynyń elderi Kaırde (Mysyr), Eýropanyń bozkilem sheberleri Bakýde (Ázerbaıjan) jınalady. Ár qurlyqtaǵy týrnırde 36 kvotadan berilse, barlyǵy 144 balýan Olımpıadaǵa barady.
Al 9-12 mamyr kúnderi Ystanbul qalasyndaǵy qorytyndy irikteý kezeńinde (World Olympic Qualifier) álem balýandary ár salmaqtaǵy eń sońǵy 3 joldama úshin talasady. Osy tusta qola júlde alǵan eki sportshy taǵy ózara kúsh synasyp, sońǵy lısenzııanyń ıegerin anyqtaýy kerek. Osylaısha, balýandar qalǵan 54 joldamanyń taǵdyry Túrkııa bozkileminde sheshedi.
Bul jerde bir eskere keter jaıt, kúres túrlerinen Olımpıadanyń joldamasy jekelegen sportshyǵa emes, UWW-ǵa múshe Ulttyq federasııalarǵa beriledi. Sáıkesinshe, Olımpıadaǵa kim baratynyn sol eldiń federasııasy ózi sheshedi.
Parıj tórinde Tokıo Olımpıadasy sııaqty ár salmaqta tańdaýly 16 balýan júldege talasady. Kúres túrlerinen Olımpıada baǵdarlamasyna barlyǵy 18 salmaq dárejesi engen. Iаǵnı grek-rım kúres boıynsha: 60, 67, 77, 87, 97, 130 kılodan joǵary, erkin kúres boıynsha: 57, 65, 74, 86, 97, 125 kılo jáne áıelder kúresi boıynsha: 50, 53, 57, 62, 68, 76 kılo.