Asyq alańy ashyldy

Asyq atý – halqymyzben birge kóneden kele jatqan ulttyq oıyndarymyzdyń bir túri. Asyqty jyldyń tórt mezgilinde oınaýǵa bolady. Bul oıyn – adamdy dáldikke, mergendikke, shapshańdyqqa, ustamdylyqqa, alǵyrlyqqa tárbıeleıdi. Medısına jaǵynan da paıdasy bar.

Saryarqa aýdanyndaǵy «Gúlder» saıabaǵynda ornalasqan alańnyń ashylýyn­­­da alǵashqy bolyp sóz alǵan atal­­­ǵan aýdannyń ákimi Baýyrjan Eraly bala kúninen asyq oınap óskenin aıtty.

«Qazir gadjettiń neshe túri damyǵan zamanda balalardy asyq oınaýǵa úıretýimiz kerek. Bul alań Respublica partııasynyń bastamasymen ashylyp otyr. Asyqty kez kelgen jastaǵy adam oı­naıdy. Sondyqtan osy jańa alań ar­qy­ly elordada asyq oınaıtyn jastar qa­ýymy qalyptasady dep senemin», dedi ol.

Odan keıin ıgilikti istiń júzege asýyna muryndyq bolǵan Respublica partııasynyń tóraǵasy, Májilis depýtaty Aıdarbek Qojanazarov ulttyq qundylyqtardy damytý týraly aıta kelip, alda elimizdiń basqa óńirlerinen asyq oınaıtyn alańdar ashýdy josparlap otyrǵanyn jetkizdi.

Sondaı-aq dál osyndaı alań elor­danyń Almaty aýdanyndaǵy «Stý­denttik» saıabaq pen Esil aýdanynyń «EKSPO» aýmaǵyndaǵy «Táýelsizdiktiń 25 jyldyǵy monýmentiniń» alańynan ashyldy. Jańa alańdardyń ereksheligi – asyq atýdyń tarıhy jáne oıyn túrleri men erejeleri týraly aqparatty arnaıy engizilgen QR-kod arqyly bilýge bolady.

Astana qalalyq Asyq atý federasııa­synyń basshysy, aǵa jattyqtyrýshy Eskendir Rahmetov keıingi jyldary el­or­dada asyq atý sportyna qyzyǵý­shy­lar­dyń qatary kóbeıgenin tilge tıek etti.

«Bizdiń qalalyq federasııada 40-tan astam sportshy tirkelgen. Olardyń arasynda álemdik deńgeıdegi halyqaralyq jarystarda top jarǵan chempıondar bar. Sonymen birge olar ulttyq oıyndarǵa tóreshilik jasaıdy. Asyqty alty jas­ta­ǵy baladan, alpystaǵy azamatqa deıin oınaıdy. Búgin bas qalada asyq oınaıtyn alańdar ashylǵanyna qýanyp turmyn. Bul óte kerek. Osyny iske asyr­­ǵan aza­mat­tarǵa rızashylyǵymdy bil­di­re­min», deıdi federasııa basshysy.

Osy kúni is-sharaǵa qatysýshylar da asyq oınap, mergendik tanytty.