Italııanyń Aýronzo qalasynda jasóspirimder men jastar arasyndaǵy baıdarka men kanoede eskek esýden álem chempıonaty máresine jetti. Jahandyq jarysqa jerlesterimiz de qatysyp, órenderimiz úsh júldege qol jetkizdi.
Sportty damytý dıreksııasynyń málimeti boıynsha, jarystyń alǵashqy kúninde Marııa Brovkova 18 jasqa deıingiler arasyndaǵy S-1 sanatynda 1000 metrge jarysta aldyna jan salǵan joq. Onyń ýaqyt kórsetkishi – 4:35.01 sekýnd. Kúmis júldeni majarstandyq Reka Sarkanı ýysyna túsirse, úzdik úshtikti ózbekstandyq Shohsanam Sherzodova túıindedi. Sondaı-aq 18 jastaǵy Batys Qazaqstan oblysynyń sportshysy 1500 metrge jarysta da baq synap, el qorjynyna kúmis júlde saldy.
Al 23 jasqa deıingi sportshylar arasynda jarys jolyna shyqqan Rýfına Ysqaqova da məre syzyǵyn ekinshi kesip, álem birinshiliginiń kúmis júldesin moınyna ildi. Ol S-1 sanatynda 1000 metr jarysta majarstandyq Borka Zagyvaıǵa ǵana jol berdi. Jalpy, bıylǵy bəsekege 65 memleketten 938 sportshy qatysty.