Bıyl Ulytaý oblysynda áleýmettik mańyzy bar nysandar qurylysy boıynsha jalpy sany 11 joba júzege asyrylady. Bul jobalar óńirdiń áleýmettik ınfraqurylymyn damytýǵa baǵyttalǵan mańyzdy bastamalar sanalady. Qarjylandyrý máselesi tolyq sheshimin tapqan jaǵdaıda, jalpy quny 57 mlrd teńgeni quraıtyn taǵy 13 jobany iske asyrý josparlanyp otyr.
Qazirgi ýaqytta Qarajal qalasynda jabyq hokkeı korty men kópfýnksıonaldy ortalyqtyń qurylysy júrip jatyr. Jabyq hokkeı kortynyń quny – 758,2 mln teńge. 2025 jyly jergilikti bıýdjetten 533,996 mln teńge bólinip, tolyq ıgerildi. Nysanda irgetas quıý, qabyrǵalardy turǵyzý, jabyn fermalaryn montajdaý, kórermender trıbýnalaryn ornatý, blokty-modýldi qazandyqty qurastyrý jumystary aıaqtalǵan. Qazirgi tańda qurylys jumystarynyń 70 paıyzy oryndalǵan. 2026 jyly qurylysty tolyq aıaqtaýǵa 200 mln teńge qajet bolsa, onyń 32,249 mln teńgesi jergilikti bıýdjetten qarastyrylǵan.
Qurylys jumystaryn merdiger uıym – «Astana premıým qurylys» JShS atqarýda. Tehnıkalyq qadaǵalaýshy – «QazArt-Qurylys» JShS, al avtorlyq qadaǵalaýdy «Cosmos Art» JShS ınvestısııalyq konsaltıngtik toby júzege asyrady. Ǵımaratty bıyl qyrkúıek aıynda paıdalanýǵa berý josparlanyp otyr.
Byltyr Qarajal qalasynda kópfýnksıonaldy ortalyqtyń qurylysy bastaldy. Joba belgilengen kestege sáıkes júrgizilip keledi. Eki qabatty zamanaýı ǵımaratta 200 oryndyq májilis zaly, óner mektebi (mýzyka, beıneleý, horeografııa baǵyttary), balalar shyǵarmashylyǵy jáne robottehnıka úıirmeleri qarastyrylǵan. Sonymen qatar kitaphana men Ardagerler keńesiniń keńsesi sııaqty áleýmettik mańyzy bar uıymdar da osy ǵımaratta ornalasady.
Jobanyń sharttyq quny – 1 560,8 mln teńge. Qurylys jumystaryn «Astana premıým qurylys» JShS júrgizip jatyr. Avtorlyq qadaǵalaýshy – «SýQurylysProekt» JShS. О́tken jyly jergilikti bıýdjetten bólingen 380 mln teńge tolyq ıgerildi. Bıyl qurylysty aıaqtaýǵa oblystyq bıýdjetten 803,835 mln teńge, jergilikti bıýdjetten 419,105 mln teńge qarastyrylǵan. Qazir qabyrǵalar men eden plıtalaryn qalaý jumysy júrgizilip jatyr. Nysandy jyl sońyna deıin paıdalanýǵa berý josparlanǵan.
Ulytaý aýdanynyń Ulytaý aýylynda merdiger «SK New Sity» JShS jabyq júzý basseıniniń qurylysyn júrgizip jatyr. Jobanyń smetalyq quny – 1 156,5 mln teńge. 2024 jyly aýdandyq bıýdjetten bólingen 53,4 mln teńge tolyq ıgerilgen. О́tken jyly «Aýyl – el besigi» baǵdarlamasy aıasynda respýblıkalyq bıýdjetten 835,996 mln teńge bólingen. Bıyl jergilikti bıýdjetten qurylysty aıaqtaýǵa 300 mln teńge qarastyrylyp otyr.
Qurylys jumystary júrgizilip jatyr. Irgetas quıylyp, ǵımarattyń metall qańqasy ornatylǵan, sendvıch paneldermen syrtqy qabyrǵalary qaptalǵan, tereze men esik bloktary ornatylǵan. Syrtqy ınjenerlik jeliler – elektr, sý qubyry júıeleri tartylǵan. Al ishki árleý, qabyrǵalardy qalaý, shatyr jabý, vıtraj ornatý jáne blokty-modýldi qazandyqty montajdaý jumystary aıaqtalý satysynda. Nysan bıyl úshinshi toqsanda paıdalanýǵa beriledi dep josparlanyp otyr.
Ulytaý aýdany ortalyǵyndaǵy Taıjan kóshesi, 33A mekenjaıynda salynyp jatqan bes blokty tıptik úlgidegi aýrýhananyń qurylysy tolyq aıaqtalmaǵan. 100 kelýshini qabyldaıtyn emhana men 20 tósektik oryn stasıonary bar bul nysannyń ashylýyn jergilikti turǵyndar asyǵa kútip júr.
Merdiger uıym – «Nur Astana Qurylys» JShS, tehnıkalyq qadaǵalaýshy – «Nuraı-Servıs» JShS. Jobanyń sharttyq quny – 3 552,9 mln teńge. Sonyń 1 483,9 mln teńgesi ıgerilgen. Medısınalyq keshenge 2023–2024 jyldary Ulttyq qor men respýblıkalyq bıýdjetten 1 239 mln teńge bólinip, ıgerildi. 2025 jylǵa Ulttyq qor esebinen 251,6 mln teńge qarastyrylǵan.
№3 blokta kotlovan qazý kezinde jerasty sýynyń shyǵýyna baılanysty jobaǵa túzetý engizildi. Saraptama qorytyndysy ótken jyldyń jeltoqsan aıynyń sońynda alynǵan. Oblystyq komıssııanyń aqpan aıyndaǵy otyrysynda bıýdjetti naqtylaý barysynda jobalyq-smetalyq qujattamaǵa túzetýler engizilip, qosymsha 476,1 mln teńge bólingen. Qurylysty aıaqtaýǵa qajetti jalpy qarjy 1 539,3 mln teńgeni quraıdy. Jaýapty mamandar qurylys jumystaryn jyldyń sońyna deıin tolyq aıaqtaýǵa ýáde berip otyr.
Sonymen qatar 2025–2026 jyldarǵa josparlanǵan ǵımarattardyń qurylysy jalǵasyp keledi. Jezqazǵan qalasynda kýrsanttarǵa arnalǵan pavılony bar avtomattandyrylǵan avtodrom qurylysy aıaqtalý satysynda. Joba boıynsha merdiger uıym anyqtalyp, qajetti arnaıy tehnıka men jabdyqtar jumyldyrylǵan.
Jaqynda oblys ortalyǵynda «Shabyt» balalar-jasóspirimder shyǵarmashylyq ortalyǵy ashyldy. Jańa nysan qurylysynyń barlyq shyǵynyn Bolat О́temuratov qory óz moınyna aldy. Jobaǵa jalpy 4 mlrd teńge ınvestısııa salynǵan. Keshen aýmaǵy 1,6 gektardy quraıdy. Munda art-stýdııa, qysh sheberhanasy (kúıdirý bólmesimen), erte damytý ortalyǵy, jekpe-jek jáne horeografııa zaldary, fızıka, matematıka, jaratylystaný, robottehnıka kabınetteri ornalasqan STEM-aımaq, sıfrlyq óner jáne grafıkalyq dızaın stýdııasy, fotostýdııa, mýzyka synyptary, shahmat kabıneti men keń akt zaly qarastyrylǵan. Ǵımarat bir mezette 250 balaǵa deıin qabyldaýǵa laıyqtalǵan. Nysan salalyq basqarmanyń balansyna berildi.
Sátbaev qalasyndaǵy ındýstrııalyq parktiń ınjenerlik-kommýnıkasııalyq ınfraqurylymynyń qurylysy bıyl aıaqtalmaq. Jobanyń sharttyq quny – 822,4 mln teńge. Sý jelileriniń qurylys jumystary tolyq aıaqtalǵan.
«Bıyl Ulytaý oblysynda taǵy úsh jańa joba bastaldy. Atap aıtqanda, Jańaarqa aýdanynda 100 oryndyq ınklıýzııany qoldaý ortalyǵynyń qurylysy qolǵa alyndy. Jobanyń sharttyq quny – 187,2 mln teńge, qurylys merzimi – 4 aı. Sátbaev qalasyndaǵy №7 BM KMM sport zalynyń qurylysy da bastaldy. Onyń quny – 447,0 mln teńge, qurylys merzimi – 6 aı. Sonymen qatar Aqseleý Seıdimbek atyndaǵy orta mektep ǵımaratyna sport zalyn qosý jobasy júzege asyrylýda. Quny – 381,4 mln teńge, qurylys merzimi – 8 aı. Qazir bul keshenderde jumyldyrý jumystary júrgizilip jatyr», deıdi Ulytaý oblysynyń qurylys, sáýlet jáne qala qurylysy basqarmasynyń basshysy Rınat Orazalyuly.
Jyl sońyna deıin paıdalanýǵa beriletin áleýmettik nysandar el ıgiligine qyzmet etedi.
Ulytaý oblysy