26-28 maýsymda Qytaıdyń Sındao qalasynda jalaýy jelbireıtin Grand Slem týrnırin qazaq jankúıerleri taǵatsyzdana kútip otyr. О́ıtkeni osy jarysta Parıj Olımpıadasynyń tarlany Eldos Smetov uzaqqa sozylǵan úzilisten soń, alǵash ret tatamıge shyǵady.
Qorjynynda Olımpııa oıyndarynyń tolyq júlde jıyntyǵy, álem chempıonatynyń altyny men qos qolasy, basqa da tolyp jatqan medaldary bar darabozdyń tatamıge shyqpaǵanyna eki jylǵa jýyqtady. Sol ýaqyt aralyǵynda dańqty balýan operasııa jasatty, em-dom qabyldady, shetelde bilim aldy. Bir sózben aıtsaq, ýaqytyn bos ótkizgen joq. Endi Eldos tatamıge qaıta oralýǵa bekinip otyr. Basty maqsaty – tyńǵylyqty jattyǵyp, qaıta babyna kelip, aldaǵy jarystarda jankúıerlerin jarqyn jeńisterimen qýantý.
Asa jeńil salmaqta E.Smetovpen birge jalyndy jas Talǵat Orynbasardyń ónerin tamashalaımyz. Parıj Olımpıadasynyń qola júldegeri Ǵusman Qyrǵyzbaev (66 kg) pen álem chempıonatynda úsh ret jeńis tuǵyryna kóterilgen Ábıba Ábýjaqynova (48 kg), jaqynda ǵana Bishkekte Azııa chempıony atanǵan dzıýdoshymyz Ádilet Almat (81 kg) ta bozkilemge shyǵady.
Sındaoda joǵaryda esimderi atalǵan beldi balýandardan bólek, Baqytjan Ábdýrahmanov, Ersultan Dúısenhan (73 kg), Abylaıhan Jubanazar (81 kg), Aıdar Arapov, Danııl Krylov (90 kg), Asqar Birjanov, Baqjan Baıtas (100 kg) kúsh synasady. Áıelder saıysynda Merýert Sársenova (52 kg), Baqyt Qusaqbaeva (57 kg), Esmıgúl Kýıýlova (63 kg), Ajar Ashat, Móldir Narynova (70 kg), Arýna Jangeldına, Ekaterına Tokareva (78 kg), Aıda Toıshybekova men Nazgúl Maratova (+ 78 kg) saıysqa túsedi.