Ushaq qonatyn kún alys emes

Aıta keteıik, qury­lys­ty bas merdiger «Elhon qurylys» JShS júzege asyryp jatyr. Búginde nysanda 300-den astam ju­mysshy men 73 tehnıka jumyl­dyrylǵan.

Merdiger uıymnyń máli­metin­she, áýejaı kesheniniń qury­ly­sy 75 paıyzǵa aıaqtalǵan. Uzyn­dyǵy 2200 metr bolatyn jasandy ushý-qoný jolaǵy, rýldeý joly, perron, drenaj júıesi, ınjenerlik kommýnıkasııalar tolyq salynyp bitken.

«Búginde nysannyń daıyn­dy­ǵy 75 paıyzdy quraıdy. Ushý-qoný jolaǵy, rúldeý joly, perron, ınjenerlik ınfra­qu­rylym tartylyp, montaj jumysy tolyq aıaqtaldy. Joba­ny belgilengen merzimde aıaqtap, paıdalanýǵa berýdi josparlap otyrmyz», dedi joba jetekshisi Erbol Qajybaev.

Qazir qurylysshylar jolaýshylar termınalyn, apat­tyq-qutqarý qyzmetiniń ǵıma­ratyn, garajdar men mate­rıal­dyq-tehnıkalyq qoıma­lardy, sondaı-aq janar-jaǵarmaı saq­taý qoımalaryn salýǵa basym­dyq berip otyr. Sonymen qatar jylý, sý, káriz, elektr jelilerin qamtıtyn syrtqy ınjenerlik je­lilerdi tartý jumystary júr­gizilip jatyr.

Áýejaı termınalynyń jalpy aýmaǵy 4 myń sharshy metrdi quraıdy. Paıdalanýǵa berilgennen keıin áýejaı Bombardier Q400, ATR 72 sekildi óńirlik áýe kemelerin qabyldaı alady. Alǵashqy synaq reısin bıylǵy jazda oryndaý jospar­la­nyp otyr. Nysandy aralaý barysynda oblys ákimi N.Saqtaǵanov jobanyń óńir úshin aıryqsha mánge ıe ekenin atap ótti.

«Bul – oblys úshin strate­gııa­lyq mańyzy joǵary joba. Sondyqtan qurylys sapasy men nysandy belgilengen merzimde aıaqtaý basty nazarda bolýǵa tıis», dedi aımaq basshysy.

Áýejaı iske qosylǵannan keıin Úrimshi qalasy, Altaı óńiri, Qanas kóli baǵyttaryna halyq­aralyq áýe reısterin ashý josparlanǵan. Sonymen qatar Astana, Almaty, О́skemen qala­laryna ishki baǵyttar boıyn­sha turaqty reıster uıym­das­tyrylady.

Jańa áýejaı Zaısan aýda­ny­nyń kólik qoljetim­di­ligin arttyryp, týrızm men kásip­ker­liktiń damýyna serpin berip, Shyǵys Qazaqstan oblysynyń halyqaralyq, óńiraralyq baı­la­­nystaryn nyǵaıtýǵa jol ashady.

Shyǵys Qazaqstan oblysy,Zaısan aýdany