Belgili tilshi, termınolog-ǵalym, professor Jáken Moldajarovtyń týǵanyna 95 jyl tolýyna oraı Qazaq ulttyq qyzdar ýnıversıtetinde «Memlekettik til jáne álem tilderin oqytý: tájirıbeler men jańa tehnologııalar» atty taqyrypta dóńgelek ústel májilisi ótti.
Qazaq tili ǵylymyn damytýǵa sanaly ǵumyryn arnaǵan professor Jáken Moldajarovtyń artynda mol mura qaldy. Ǵalym basshylyq qyzmette júrse de, ǵylymı zertteý isine belsene qatysyp, qazaq tilinde oqýlyqtar jazýǵa den qoıdy. 1983–1992 jyldary qazirgi Qazaq ulttyq qyzdar ýnıversıtetiniń shetel tilderi kafedrasyna basshylyq etip, 1992 jyldan ómiriniń sońyna deıin «Qaınar» ýnıversıtetiniń birinshi prorektory boldy. Sondaı-aq Abylaı han atyndaǵy Qazaq halyqaralyq qatynastar jáne álem tilderi ýnıversıtetinde aǵylshyn fakýltetiniń dekany, oqý ornynyń prorektory bolyp qyzmet etti. Sol jyldary joǵary oqý ornynda qazaq bólimin ashýǵa bastamashy bolyp, qazaq bólimi stýdentterin oqýlyqtarmen, kóptegen ádistemelik quralmen qamtamasyz etýge basshylyq etti. Qazaq ulttyq qyzdar pedagogıkalyq ýnıversıtetiniń partııa uıymy hatshysy ári shetel tilderi kafedrasynyń meńgerýshisi boldy.
Professor J.Moldajarov jańa qyzmetke taǵaıyndala salysymen kafedranyń ǵylymı-pedagogıkalyq quramy sapasyn arttyrýǵa basa nazar aýdardy. Oqytýshylardy maqsatty túrde aspırantýraǵa jiberip, 3–5 jyl ishinde kafedrany ǵylym kandıdattarymen tolyqtyrdy. Lıngvıstıkalyq termınderdiń qalyptasýy men damýyna arnalǵan monografııalyq eńbekter men mektepke arnalǵan aǵylshyn tili oqýlyqtary avtorlarynyń biri retinde kafedra múshelerine oqý, oqý-ádistemelik quraldar, qazaqsha-oryssha-aǵylshynsha kóptildi sózdikter jazýǵa basshylyq etti. Ǵalym «Qazaq lıngvıstıkalyq termınologııasynyń qalyptasýy men damýy» taqyrybynda kandıdattyq dıssertasııa qorǵady. Stılıstıkany zertteýmen aınalysty. Ol – 80-nen asa ǵylymı eńbektiń avtory. 1964 jyly alǵash ret aǵylshyn tili muǵalimderine arnap oqý quralyn jazdy.Alqaly jıynnyń ashylýynda Qyzdar pedagogıkalyq ýnıversıtetiniń basqarma tóraǵasy-rektor Beıbitkúl Kárimova: «Oqý ornynyń shetel tilderi kafedrasyn uzaq jyl basqaryp, onyń ǵylymı áleýetin arttyrýǵa zor úles qosqan kórnekti ǵalym Jáken Moldajarovtyń 95 jyldyǵyna arnalǵan jıyn básekege qabiletti pedagogter daıarlaýdyń jańa baǵytyn aıqyndap, tyń bastamalarǵa jol ashady. Qazirgi jahandaný dáýirinde memlekettik tildi sapaly meńgertýmen qatar, álem tilderin kásibı deńgeıde oqytý – zaman talaby», dep atap ótti.
Shetel tilderin oqytýdyń ózekti máselelerin sóz etken akademık Kárimbek Qurmanálıevtiń pikirinshe, kóp til meńgergen tulǵa qalyptastyrý, shet tilin oqytýdy jańa deńgeıge jetkizý máselesi egemen elimizdiń bilim júıesiniń mańyzdy mindetine aınalyp otyr.
«Professor Jáken Moldajarovtyń Almaty pedagogıkalyq shet tilderi ınstıtýtynda qazaq bólimin ashyp, stýdentterge aǵylshyn, nemis, fransýz tilderinde oqýlyqtar jazýǵa, oqý quraldaryn daıyndaýǵa úlken úles qosqan ǵalymnyń otandyq til bilimin damytýdaǵy orny aıryqsha. Kóptildi meńgergen mamandar daıarlaý isinde, tulǵa qalyptastyrý úderisinde tildik quzyrettilikti arttyryp qana qoımaı, iskerlik qarym-qatynas tilin damytyp, qoǵamnyń lıngvıstıkalyq, ıntellektýaldyq áleýetin arttyrýǵa zor úles qosqanyn umytpaýymyz kerek. Qazirgi ýaqytta birneshe tildi meńgergen jastarymyz kún sanap artyp keledi. Bul – qýanarlyq jaıt. Biraq birneshe shetel tilin meńgerip, ókinishke qaraı, ana tilimizde sóıleı almaıtyn nemese sóılemeıtin jastar qatarynyń da kóp ekeni qynjyltady. Osy tusta, halqymyzdyń birtýar azamaty Halel Dosmuhamedovtiń «Ana tilin jaqsy bilip turyp, bótenshe sóıleseń, bul – súıinish. Ana tilin bilmeı turyp, bótenshe jaqsy sóıleseń, bul – kúıinish» degen qaǵıdatyn ár kez qaperde ustaǵanymyz jón», dedi akademık óz sózinde.
Jıyn barysynda akademık Zeınep Bazarbaeva, fılologııa ǵylymdarynyń doktory, professor Tańat Aıapova, pedagogıka ǵylymdarynyń doktory, professor Jańalyq Baltabaeva, Ál-Farabı atyndaǵy QazUÝ professory, PhD Altynshash Qurmanáli, pedagogıka ǵylymdarynyń doktory, professor Aıgúl Sátbekova, taǵy da basqa ǵalymdar baıandama jasap, tájirıbelerimen bólisti.
Jıyn sońynda professor J.Moldajarovtyń qyzy Dınara Jákenqyzyna ýnıversıtet tarapynan syı-qurmet kórsetildi.
ALMATY