Ulttyq kitaphanada Qazaqstannyń eńbek sińirgen qaıratkeri, fılologııa ǵylymdarynyń doktory, professor Dandaı Ysqaqulynyń 80 jas mereıtoıyna arnalǵan «Ustaz. Ǵalym. Synshy» atty ádebı-shyǵarmashylyq kesh ótti.
Alqaly jıynǵa ǵalymdar men zııaly qaýym, qoǵam qaıratkerleri men jýrnalıster qatysty. Kesh barysynda ǵalymnyń «О́mir dúnıe degeniń» atty jańa kitaby tanystyryldy. Sondaı-aq Ulttyq kitaphana qorynan ádebıettanýshynyń ǵylymı eńbekteri, ádebı-syn maqalalary men zertteýlerinen kitap kórmesi qoıyldy.
Ulttyq kitaphana dırektory Ǵazıza Qudaıbergen Dandaı Ysqaqulynyń kitaphanamen baılanysyna erekshe toqtaldy. Onyń aıtýynsha, ǵalym kitaphananyń turaqty oqyrmanynyń biri retinde ǵylym men bilim jolyndaǵy izdenisterin osy qarashańyraqpen sabaqtastyryp keledi. Ǵazıza Qudaıbergenqyzy Dandaı Ysqaqulynyń ǵylymı eńbekteri men rýhanı murasy kitaphana qoryn baıytyp qana qoımaı, jas zertteýshiler men oqyrmanǵa qundy tanym kózine aınalǵanyn atap ótti. Sondaı-aq ol ǵalymnyń kitaphana ómirine belsendi aralasyp, ádebı-ǵylymı ortanyń damýyna úles qosyp júrgenin aıtty.
M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov Dandaı Ysqaqulynyń qazaq ádebı synynyń tarıhy men teorııasyn zertteýdegi eńbegine toqtaldy. Ol ǵalymnyń ádebı syndy derbes ǵylymı baǵyt retinde júıeleýge úles qosqanyn, qazaq ádebıetiniń tarıhy men teorııasyna arnalǵan irgeli zertteýlerdiń avtory ekenin atap ótti. Sondaı-aq Dandaı Ysqaqulynyń ensıklopedııalyq basylymdardy ázirleýge qatysyp, ádebıettanýshy ǵalymdardyń birneshe býynyn tárbıeleýge eńbek sińirgenin basa aıtty.
Al fılologııa ǵylymdarynyń doktory Nurdáýlet Aqysh ǵalymnyń qazaq ádebıettanýdaǵy eleýli ornyna toqtaldy.
«Dandaı Ysqaquly ádebıettaný ǵylymyna ótken ǵasyrdyń 70-jyldary kelip, qazaq ádebı synynyń teorııasy men tarıhyn júıeli zerttegen ǵalymdardyń aldyńǵy qataryna kóterildi. Onyń «Ádebı kórkem syn», «Syn shyn bolsyn», «Syn janrlary», «Syn óneri», «Qazaq ádebı synynyń tarıhy», «Ádebı synnyń tarıhy» sııaqty irgeli eńbekteri ulttyq ádebı syn ǵylymynyń qalyptasýy men damýyn ǵylymı turǵydan zerdeleýge arnaldy. Ǵalymnyń zertteýleri qazaq ádebıettanýynyń mańyzdy qoryna aınaldy», dedi ol.
Sondaı-aq aqyn, fılologııa ǵylymdarynyń doktory Baýyrjan Jaqyp Dandaı Ysqaqulynyń ǵalymdyq jáne azamattyq bolmysy týraly sóz qozǵady. Ol mereıtoı ıesiniń qazaq ádebıettanýy men ádebı synynyń damýyna qosqan úlesin atap ótip, ádebıet pen ǵylymdy qatar alyp júrgen tulǵanyń eńbegi keıingi býyn zertteýshiler úshin mańyzdy rýhanı, ǵylymı mura ekenin tilge tıek etti.
Kesh barysynda sóz alǵan qoǵam qaıratkeri Asyly Osman ǵalymnyń ult rýhanııatyna sińirgen eńbegi týraly baıandady. Ol D.Ysqaqulynyń qazaq ádebıeti men tiliniń damýyna qosqan úlesin atap ótip, ulttyq qundylyqtardy nasıhattaý jolyndaǵy qyzmetine joǵary baǵa berdi.
Aıta keteıik, jańa jınaq – Dandaı Ysqaqulynyń adam ómiriniń máni, baqyt, adamgershilik, ar-ojdan, adaldyq, ımandylyq jáne rýhanı kemeldený máselelerine arnalǵan fılosofııalyq-tanymdyq eńbegi. Avtor ǵasyrlar boıy adamzat jınaǵan rýhanı murany, ǵylym jetistigin jáne ulttyq dúnıetanymdy sabaqtastyra otyryp, ómirdiń tabıǵı zańdylyqtaryn, adamnyń qoǵamdaǵy ornyn, maqsat pen murattyń mańyzyn paıymdaıdy. Kitapta ata-anaǵa qurmet, otbasy tárbıesi, azamattyq jaýapkershilik, eńbekqorlyq, namys pen parasat sııaqty qundylyqtar keńinen sóz bolady. Adam balasynyń baqytqa jetý joly materıaldyq ıgilikten buryn rýhanı tazalyqpen, adal eńbekpen, izgi nıetpen, óz ómiriniń mánin tabýmen ólshenedi deıdi. Avtor jas urpaqty úlken maqsat qoıýǵa, bilim men ǵylymǵa umtylýǵa, ata-ananyń qadirin bilýge, ulttyq jáne jalpyadamzattyq qundylyqtardy baǵalaýǵa úndeıdi.