Ulttyq ulannyń aqparattyq-nasıhat toby Shyǵys Qazaqstan oblysyna qarasty Shemonaıha qalasyna jumys saparymen bardy.
Úgit-nasıhat tobyn bastap kelgen áskerdiń bas tárbıeshisi, general-maıor Qaırat Úmbetov qala irgesinde ornalasqan 6699 áskerı bólimine soǵyp, sarbazdardyń jáne áskerı bólimniń jaǵdaıymen tanysty. Sapar barysynda Ulttyq ulan ardagerleri, aýǵan jerinde qyzmet etken jaýyngerler, sarbazdar jáne oqýshylardyń qatysýymen II dúnıejúzilik soǵys qurbandaryn eske alýǵa arnalǵan memorıalǵa gúl shoqtaryn qoıý rásimi ótti. Is-shara erlikpen qaza tapqan batyrlardy 1 mınýt únsizdikpen eske alýdan bastaldy.
«Surapyl soǵys jyldary Shemonaıha aýdanynan maıdan dalasyna 8077 adam attanyp, onyń 5312-si mert bolǵan. Aýdan tarıhyna qarap otyrsaq, 2437 adam iz-tússiz joǵalyp ketken eken. Olar el irgesin jaýdan qorǵaý úshin oqqa keýdelerin tosty. Sondyqtan biz saparymyzdy batyr atalarymyzdyń rýhyna taǵzym etip, «Dańq alaýy» eskertkishine gúl shoǵyn qoıýdan bastaǵandy jón kórdik», dedi Ulttyq ulan Bas qolbasshysynyń TjÁQJ jónindegi orynbasary.
Sondaı-aq ol óńirlerdi aralaýdaǵy basty maqsatyn aıtyp, aýdan turǵyndaryna Ishki ister mınıstriniń orynbasary – Ulttyq ulan Bas qolbasshysy, general-leıtenant Erkin Botaqanovtyń sálemin jetkizdi. Jıynda aýdandyq ınternasıonalıst-jaýynger ardagerler keńesiniń tóraǵasy Aleksandr Krıvsov pen aýdan ákiminiń orynbasary Baqytjan Moldahanov sóz sóıledi. Olar qurmetti qonaqtardyń arnaıy aýdan ortalyǵyna atbasyn burǵanyna rızashylyqtaryn bildirdi. «Búgingi is-shara jas urpaqtyń boıyndaǵy qazaqstandyq patrıotızmdi qalyptastyrýǵa sózsiz áser eteri anyq. Ulttyq ulan el tynyshtyǵyn saqtaýda zor mánge ıe. Osy jolda abyroıly qyzmet ete berińizder», dedi aýdan ákiminiń orynbasary.
Meımandar osydan soń el arasynda «Marııanyń jartasy» atalyp ketken jerge bardy. Bul jerde qonaqtardy ólketaný mýzeıiniń ókili Natalıa Rýdakova qarsy aldy. Munda oń qolyn keýdesine qoıyp, jartas jıeginen tómenge qarap turǵan muńdy qyzdyń músini qoıylypty. Mýzeı qyzmetkeriniń aıtýynsha, bul – shemonaıhalyq jazýshy Anatolıı Ivanovtyń «Tenı ıschezaıýt v polden» romanyndaǵy keıipker – Marııa Voronovanyń jıyntyq obrazy. Osydan soń Natalıa Iýrevna qonaqtardy ólketaný mýzeıine qoıylǵan jádigerlermen jáne aýdan tarıhymen tanystyrdy.
Sapar barysynda general-maıor Qaırat Jarylǵasynuly Ulttyq ulan sapynda kelisimshart boıynsha qyzmet etetin kóp balaly otbasymen jolyqty. Búldirshinderge Ulttyq ulannyń Bas qolbasshysy atynan syılyq tabystady. Al keshkilik aýdan turǵyndaryna arnalǵan kóshpeli konsert uıymdastyryldy. Sahnada Ulttyq ulan Án-bı ansambliniń qyz-jigitteri óner kórsetti. Olar halyq ánderinen bastap, estradalyq ánderge deıin oryndady. Kórermender dombyranyń kúmbirlegen únine, myń buralǵan bıshilerdiń qımylyna tánti bolyp, qoshemet bildirip otyrdy. Áýezdi án kórermen júregine jetkeni sonshalyq, kózine jas alyp, júrek tebirenisin jasyra almaǵandar da boldy.
«Men konsert dál osyndaı dárejede bolady dep kútpegen edim. Maǵan qatty unady. Men osy óńirdiń týmasymyn. Búginde Almaty qalasynda turyp jatyrmyn. Demalysty paıdalanyp týǵan jerime kelgen edim. Osyndaı tamasha keshke tap boldym. Ansambl músheleri óte talantty eken. «Lıýbov ýstavshıh lebedeı» ánin oryndaǵan Sáken Álimhanovqa rıza boldym. Men ony elimizdiń maqtanyshy Dımash Qudaıbergenge uqsattym. Ánge ilesip, bı bılep sergip qaldyq», dedi aýdan ortalyǵyna qonaqqa kelgen Olga Grıshenko.
Konsert kezinde general-maıor Qaırat Úmbetov Shemonaıha turǵyndaryn aýdannyń 95 jyldyq mereıtoıymen quttyqtap, Ulttyq ulannyń jaýyngerlik qyzmeti jaıly sóz qozǵady. Sondaı-aq aýdan ákimdigine arnaıy ákelgen estelik syılyqtaryn tabystady.