Balalar dárigeriniń orny

Qoǵamdyq uıym aldynda turǵan negizgi mindet – jańa týǵan sábıler arasyndaǵy ólim kórsetkishin azaıtý. Uıymnyń alǵash­qy májilisinde osy jyldyń birinshi jarty­jyldyǵyndaǵy náreste ólimin tómendetý boıynsha atqarylǵan jumystar talqylandy. M.Ospanov atyndaǵy BQMÝ №2 balalar aýrýlary kafedrasynyń dosenti Arystan Dosymov balalar onkologııalyq aýrýlaryn erte anyqtaý boıynsha baıandama jasady. Ol kez kelgen medısınalyq mekemeniń qyzmetkeri onkologııalyq dertke kúdik týdyrǵan belgilerdi boldyrmaýǵa baǵyttalǵan jumystardy basty nazarda ustaý kerek ekenin alǵa tartty.

Qazirgi ýaqytta Aqtóbe oblysy turǵyn­darynyń sany 922 myń 697 adam bolsa, onyń 35%-yn 18 jasqa deıingi jetkinshekter quraıdy. Oblystyq densaýlyq saqtaý bas­qarmasy basshysynyń orynbasary Baqyt­jan Túlkibaevanyń habarlaýynsha, túr­li syrqatpen dárigerler esebinde turǵan sábıler óńirdegi balalar sanynyń 7,9%-yn quraıdy. Dálirek aıtqanda, Aqtóbe oblysynda 6 myńǵa jýyq balanyń densaý­lyǵynda kinárat bar. Máselen, 600 bala aýtızm syrqatyna shaldyqsa, 1 100 bala tirek-býyn júıesi keselimen dúnıege kelgen. Keıingi ýaqytta aqyl-esi kem, júıke júıesi kináratymen dúnıege kelgen náresteler sany da azaımaı tur. Týabitti kemistigi bar sábıler kóbeıgen saıyn balalar dárigeriniń jumysy da kúrdelene túsedi. Onyń ústi­ne sábılerine ekpe alýǵa úzildi-kesildi qarsy ata-analarmen túsinik jumystaryn júrgizý ýchaskelik dáriger men medbıkege mindettelgen jazylmaǵan qaǵıdaǵa aınaldy. Ashyǵyn aıtqanda, balalar dárigeriniń mindetin otbasylyq jalpy tájirıbedegi dáriger almastyrǵaly beri sábı syrqatyn erte anyqtap, emdeý isi kúrdelenip ketti.

Qazirgi ýaqytta Aqtóbe oblysynda 1 498 balalar dárigeri bolǵanyna qara­mastan pedıatr mamannyń tapshylyǵy seziledi, ásirese, aýdandyq emhanalarda. Keıingi derek boıynsha óńirde 18 pe­dıatr, 4 neanatolog maman jetispeıdi. Osy tap­shylyqtyń ornyn toltyrý maqsatynda jyl saıyn jer­gilikti bıýdjet qarajaty esebinen stýdent­terdi oqytý jumysy qolǵa alynyp keledi. Bıyl Aqtóbedegi M.Ospanov atyn­daǵy Batys Qazaqstan medısına ýnıver­sıtetin grant negizinde balalar dárigeri mamandyǵymen bes stýdent, neanatolog mamandyǵy boıynsha úsh stýdent aıaqtap, aýdandyq aýrýhanalarǵa ornalasyp jatyr.

Búginde densaýlyq saqtaý basqar­masynda 36 shtattan tys dáriger tirkel­gen. Olardyń qatarynda zeınetke shyq­qan tájirıbeli mamandar da bar. Taıaý­da «Pedıatr qoǵamy» músheleri 12 aýdan­nyń eldi mekenderin aralap, aýyl turǵyn­daryna medısınalyq kómek kór­set­pekshi. Olardyń josparynda eń shalǵaı aýyl­dardaǵy dárigerlik baqylaýdan tys qalǵan sábılerdi tekseristen ótkizý bar.