Polshanyń bas shahary – Varshavada uıymdastyrylǵan áıelder kúresinen XXVII Poland Open halyqaralyq týrnıri óz máresine jetip, jerlesterimiz baıraqty básekede 2 kúmis jáne 3 qola medal jeńip aldy.
Sportty damytý dıreksııasynyń málimeti boıynsha, Polsha bozkilemindegi básekelerde jerlesterimizden Irına Kazıýlına (65 kg) men Anastasııa Panasovıch (72 kg) bas júlde úshin ótken beldesýlerde qarsylastaryna jol berip, kúmis júldemen kúpteldi. Atap aıtqanda, Irına Kazıýlına fınaldyq básekede ýkraınalyq Iýlııa Leskovestiń osal tusyn taba almasa, Anastasııa Panasovıch fransııalyq Kendra Ogıýsten Djoselın Dacherge ese jiberdi.
Sonymen qatar Aınur Áshimova (55 kg), Dıana Kaıýmova men Gúldana Bekesh (59 kg) óz salmaǵynda qola júldege ıe boldy. Jalpykomandalyq esepte Polsha quramasynyń balýandary kósh bastasa, Qazaqstan men Kanada sportshylary úzdik úshtiktiń qatarynan kórindi.