13-19 tamyz kúnderi Taılandtyń bas shahary – Bangkokta basketboldan áıelder arasyndaǵy Azııa kýbogi (B dıvızıony) dodasynyń shymyldyǵy túriledi. Sary qurlyq básekesine qatysatyn elimizdiń ulttyq quramasy bul kúnderi elordadaǵy «Tarlan Arena» sport kesheninde oqý-jattyǵý jıynyn ótkizip jatyr. Azııa birinshiliginiń qarsańynda ulttyq quramanyń bapkerleri men federasııa basshylyǵy komandanyń daıyndyǵy týraly baıandap berdi.
Basketboldan áıelder arasyndaǵy ulttyq quramanyń menedjeri jáne bapkerler quramynyń múshesi Azamat Abdýlkárimovtiń aıtýynsha, Qazaqstan quramasy bıylǵy Azııa kýboginde B dıvızıonnan A lıgasyna shyǵýdy maqsat etip otyr.
«Elordada oqý-jattyǵý jıynyn ótkizip jatqanymyzǵa bir aptadan asty. Alda áli tolyq taǵy bir apta jattyǵamyz. О́tken jetide qyzdarymyz dene daıarlyǵy jattyǵýlaryn ótkizse, budan bylaı kóbirek taktıkaǵa kóńil bólemiz. Elimizde áıelder basketboly endi-endi qanat jaıyp, damýdyń dańǵyl jolyna túsip kele jatyr. Ishki chempıonatta oınaıtyn komandalardyń da qatary jyl saıyn artyp keledi. Bul, árıne, eń birinshi kezekte ishki básekelestikti arttyrady. Al báseke bar jerde kez kelgen sala alǵa qaraı jyljıtyny aıtpasa da túsinikti. Soǵan qaramastan, aldaǵy Azııa kýbogi jarysynda joǵary topqa qosylý úshin bar kúshimizdi salamyz. Qyzdarymyz Bangkokta Iordanııa, Taıland jáne Shrı-Lanka quramalarymen sheberlik baıqasady. Toptaǵy basty qarsylasymyz Iordanııa quramasy bolmaq. Taıland sportshylary da óz alańynda, jankúıerleriniń qoldaýy aıasynda oınaıtyn bolǵan soń, olar da aıanyp qalmaıtyny anyq», dedi A.Abdýlkárimov.
Al basketbol federasııasynyń prezıdenti Abaı Alpamysov ulttyq quramanyń ishki problemasyna toqtalyp, qarjynyń azdyǵyna baılanysty sportshylar sary qurlyq básekesiniń aldynda bir ǵana oqý-jattyǵý jıynyn ótkizýge májbúr ekenin aıtty.
«Qyzdarymyz Azııa kýbogi jarysy aldynda josparlanǵan oqý-jattyǵý jıynyn ótkizip jatyr. Negizi mundaı baıraqty dodalardyń aldynda sportshylar keminde eki-úsh jattyǵý jıynynan ótýi kerek. Shetelderde shynyǵyp, myqty quramalarmen sparrıng-jattyǵý ótkizgeni qyzdarymyzǵa aldaǵy mańyzdy jarys aldynda úlken septigin tıgizer edi. Biz qazir demeýshi, qosymsha qarjy tartý boıynsha jumys istep jatyrmyz. Aldaǵy ýaqytta jattyǵýlar sanyn kóbeıtýge tyrysamyz», dedi federasııa basshysy.
Basketboldan áıelder arasyndaǵy Azııa kýboginiń A tobynda Indonezııa, Iran, Malaızııa jáne Mońǵolııa quramalary kúsh synassa, Qazaqstan quramasy B tobynda Shrı-Lanka, Taıland jáne Iordanııa qyzdarymen sheberlik baıqasady. 8 qurama ishinde jeńiske jetkeni 2025 jyly ótetin Azııa kýboginiń A dıvızıonyna joldama alady.
Qazaqstan quramasynyń
oıyndar kestesi:
13 tamyz 2023: Qazaqstan – Shrı-Lanka
14 tamyz 2023: Taıland – Qazaqstan
15 tamyz 2023: Qazaqstan – Iordanııa
17-18-19 tamyz: Pleı-off kezeńi