Kezekti oqý jylynan keıingi jazǵy demalys oqýshy úshin de, ustaz úshin de jannyń dárýi ekeni belgili. Ásirese arqany keńge salyp, dostarmen arqa-jarqa bolyp asyr salatyn balalar bul sátti asyǵa kútedi. Al jazǵy demalys bosqa ótpeı, mándi de mazmundy órilse, zor baqyt. Bul oraıda jazǵy lagerlerdiń orny aıryqsha.
Jazǵy demalys bel ortasynan assa da, lagerlerdegi jumys áli qyzyp tur. Astananyń irgesindegi «Borovıchok» saýyqtyrý ortalyǵyna barǵanda osyǵan taǵy da kóz jetkizdik. Ortalyq alda kele jatqan aıtýly data – Abaı kúnine oraı arnaıy is-shara uıymdastyrdy. Kóppen birge biz de sonyń kýási boldyq. Astana qalalyq bilim basqarmasynyń basshysy Qasymhan Senǵazyev bastap barǵan delegasııa oqýshylardyń oryndaýynda Abaı ánderi men óleńderin, qarasózderin tyńdady. Balalar arasynda túrli ıntellektýaldy oıyndardy tamashalady.
«Jazǵy lagerde balalardyń demalýy men saýyqtyrýyna qandaı jaǵdaı jasalyp jatqanyn kórý úshin jınaldyq. Osy bir izgi nıetimiz Abaı kúnimen tuspa-tus kelipti. Soǵan oraı lagerde Abaı kúnine arnalǵan is-sharalar ótip jatyr. Ár kezeńniń óz baǵyty bar. Soǵan sáıkes osy kezeńdi Abaı kúnine arnadyq. Buǵan deıingi is-sharalar Astana kúni men Balalardyń quqyqtaryn qorǵaý kúnine oraılastyrylǵan edi. Jalpy, jazǵy maýsymda lagerlerde balalardyń tárbıesine, ulttyq qundylyqqa erekshe kóńil bólý kózdelgen», dedi basqarma basshysy.
Qasymhan Senǵazyevtyń aıtýynsha, ulttyq qundylyqtarǵa sáıkes tárbıe, bilim berý úderisi tek lagerde ǵana júrgizilmeıdi. Basqarma muny úzdiksiz úderiske aınaldyrý baǵytynda jumys júrgizip jatyr.
«Máselen, byltyr muny bes mektepke pılottyq negizde josparǵa engizgen bolatynbyz. 2022-2023 oqý jylynda 20 mektepke kóbeıttik. Qazir qalǵan mektepterdiń ókilderi de oqý biliktiligin arttyrý kýrstarynan ótip jatyr. 2025 jylǵa deıin barlyq mektep ulttyq qundylyqtarda negizdelgen bilim berý baǵyty boıynsha jumys isteıtin bolady. Qanatqaqty joba uıymdastyrylǵan kezde tek bir mekteptiń ózinen oń ózgeristerdi baıqadyq. Aıtalyq, bul joba qaladaǵy №8 mektepte oıdaǵydaı iske asyryldy. Nátıjesinde, munda balalardyń sabaqqa keshigýi, sabaqqa kelmeı qalýy sekildi tártip buzýshylyqtar tirkelgen joq. Oqý jyly boıy eshqandaı quqyq buzýshylyqtar tirkelmegen. Bul – sabaq berý úderisinde tárbıege kóbirek kóńil bólgenimizdiń nátıjesi», dedi ol.
Elordada jazǵy kezeńde balalardyń shamamen 98 paıyzy jazǵy lagermen qamtylǵan. Bul 1-den 10 synypqa deıingi 186 myńnan astam oqýshy bolsa, onyń ishinde az qamtylǵan jáne jetim balalar shamamen 10 myńdy quraıdy. Qalanyń bilim berý uıymdarynyń bazasynda 155 demalys lageri, onyń ishinde 85 mektep janyndaǵy lager, 68 beıindik lager jumys istedi. Qala syrtyndaǵy «Arman», «Borovıchok» lageriniń 1, 2, 3, 4 kezeńinde 1 363 bala qamtylǵan. Onyń ishinde 500 bala «Jalpyǵa birdeı mindetti oqýmen qamtý» baǵdarlamasy aıasynda tegin qamtylypty. Bul lagerlerde balalardyń demalysy 29 tamyzǵa deıin jalǵasady.
Lagerde demalyp jatqan balalarmen de tildesip kórdik. Rahmetolla Astanadaǵy Abaı atyndaǵy №87 mektep-gımnazııanyń 4-synybyn bitiripti.
«Maǵan mundaǵy demalys unady. Abaı kúnine arnalǵan is-sharalarǵa belsene qatysýǵa tyrystym. О́ıtkeni ózim Abaı atyndaǵy mektepte oqımyn. Bizdiń mektepte hakim atamyzdy nasıhattaýǵa erekshe kóńil bólingen. Mundaǵy árbir oqýshy onyń ómirbaıanyn, shyǵarmalaryn jaqsy biledi. О́z basym Abaı atamyzdyń 50-ge jýyq óleńin jatqa bilemin», deıdi Rahmetolla.
«Bul lagerge jyl saıyn kelemin. Jańa dostar taýyp, qyzyqty kúnderdiń kýási bolamyz. Munda tek oıyn oınap qana qoımaı, túrli tanymdyq is-sharaǵa da qatysamyz», deıdi astanalyq Aleksandr esimdi oqýshy.
Saltanat BAITEKENOVA,
H.Dosmuhamedov atyndaǵy Atyraý ýnıversıtetiniń 4-kýrs stýdenti