Sý tapshylyǵy Astana jurtyn birazdan alańdatyp keledi. Bul másele elordamyzda ǵana emes ózge aımaqtarda da bar. Jalpy bul – HHI ǵasyrdyń eń ózekti máseleleriniń biri. Prezıdent turǵyndarǵa kúndelikti qoldanysta sýdy únemdeý kerek degen bolatyn. Ǵalymdar da aýyl sharýashylyǵy salasy tamshylatyp sýarý júıesine tolyq kóshý kerek dep dabyl qaǵyp jatyr.
Sý tapshylyǵy máselesi jyl ótken saıyn kúrdelene túspese, sheshile qoıýy ekitalaı. О́ıtkeni qala damyp, adam kóbeıgen saıyn qajettilik te arta beredi. Ázirge amaldaı turatyn jalǵyz jol – sýdy únemdeý. «Sýdyń da suraýy bar» degendi ábden túsinetin kez jetken sııaqty. Prezıdent Qasym-Jomart Toqaev ta «2030 jylǵa qaraı sý tapshylyǵynyń kólemi 40 paıyzǵa jetýi múmkin. Sondyqtan biz jańa tehnologııalar men sıfrlandyrý arqyly sýdy únemdeýge kóshýimiz kerek. Sý tapshylyǵyn joıýdyń basqa joly joq. Bul – asa mańyzdy mindet. Úkimet sý paıdalanýdy retteý jáne ony únemdeý tehnologııasyn engizý jumysyn yntalandyrý úshin naqty sheshimder ázirleýge tıis», dep tapsyrma bergen. Al BUU málimetinshe, elimiz 2040 jylǵa qaraı aýyz sý tapshylyǵy qaýpi óte joǵary 44 eldiń qataryna kiredi. Demek qaı salada bolsyn sýdy únemdeýdi qazirden bastaý kerek. Ásirese elimiz úshin asa mańyzdy aýyl sharýashylyǵy salasynda ǵalymdarymyz usynyp otyrǵan tamshylatyp sýarý ádisine kóshýdi kesh qalmaı qolǵa alǵan jón.
Aýyl sharýashylyǵy ǵylymdarynyń doktory, professor Jumaǵalı Ospanbaevtyń aıtýynsha, sý tapshy bolsa, eginshilerdiń ekken egini shyǵynǵa ushyraıdy. Sondyqtan aýyl sharýashylyǵy salasynda sýdy kól-kósir qoldanýdy qoıyp, Memleket basshysy aıtqandaı, ǵylymı jetistikterdi paıdalanyp, jańa tehnologııalar men sıfrlandyrý arqyly únemdeýdi qolǵa alý qajet.
Ulttyq statıstıka bıýrosynyń deregi boıynsha, aýyl sharýashylyǵy daqyldary 23 162,1 gektar egistikke egiledi. Al egilgen eginniń bári bitik shyǵýy úshin sý qajet. Qazirgi kezde sharýalardyń qaýip eteri de – qýańshylyq.
– Qazaq eginshilik jáne ósimdik sharýashylyǵy ǵylymı-zertteý ınstıtýtynyń ǵylymı toby osy máseleniń sheshimi retinde elimizdiń ońtústik-shyǵysyndaǵy negizgi sýarmaly daqyldardy – kúzdik bıdaı, qant qyzylshasy, soıa jáne júgerini ósirý tehnologııalaryn ázirleý jónindegi jobany iske asyrdy. Joba tamshylatyp sýarý negizinde sýarmaly eginshiliktiń ónimdiligin arttyrýǵa baǵyttalǵan. Nátıjesinde, sýarmaly egistiktegi ónim shyǵymy edáýir artady. Alynǵan nátıjeler topyraqtyń qunarlylyǵyn saqtaý men molyqtyrýdy qamtamasyz etedi. Sondaı-aq sýarmaly eginshiliktiń jańa júıesin ázirleý úshin negiz bola alady, – deıdi joba jetekshisi J.Ospanbaev.