Qytaıdyń Chendý qalasynda uıymdastyrylǵan XXXI Jazǵy ýnıversıada máresine jetti. Jer-jahannyń 118 elinen kelgen 7 500 atlet sporttyń 18 túri boıynsha 269 medal jıyntyǵyn sarapqa saldy.
Bir aptadan asa ýaqytqa jalǵasqan stýdent sportshylardyń saıysynda el quramasynyń ókilderi 20 medal (2 altyn, 7 kúmis, 11 qola) oljalap, jalpykomandalyq esepte 20-orynǵa taban tiredi. Atap aıtar bolsaq, ýnıversıada básekelerinde gımnast Mılad Karımı men taekvondoshy Rıta Bákisheva top jarsa, kúmis júldege Mılad Karımı, Narıman Qurbanov, mergen Dıana Tursynbek, gımnast Eljana Tanıeva (eki ret), myltyqtan 50 metrden oq atýdan erler quramasy jáne jekeleı synda Nıkıta Chırıýkın ıe boldy.
Al M.Karımı, E.Tanıeva, taekvondodan, semserlesýden jáne 10 metrden myltyqpen oq atýdan elimizdiń erler ulttyq quramalary, dzıýdoshylar – Bekarys Sádýaqas, Suńǵat Jubatqan jáne Asqar Narqulov, júzý sportynan Ádilbek Mýsın, sonymen qatar ýshý saıysynan Beksultan Qaskenov pen Áıgerim Tórehanov qola júldegerler atandy.
Jalpykomandalyq esepte Qytaı quramasy jeńiske jetti. Olardyń enshisinde ýnıversıadanyń 178 medali (103 altyn, 40 kúmis, 35 qola) bar. Ekinshi orynǵa 93 júldemen Japonııa sportshylary jaıǵassa (21+29+43), úzdik úshtikti Ońtústik Koreıa quramasy túıindedi – 58 (17+18+23).