QR Aqparat jáne qoǵamdyq damý mınıstri Darhan Qydyráli áleýmettik jelidegi paraqshasynda Qazaqstan azamattaryn jastar kúnimen quttyqtap, jas urpaqqa jazba arnady, dep habarlaıdy Egemen.kz.
«Halqymyzda «Aqyl – jastan, asyl – tastan» degen naqyl sóz bar. Jastar qashanda úlken ózgeristerdiń basynda turǵan. Keshegi qıyn-qystaý zamanda eldik pen erliktiń bastaýynda bolǵan – jastar. Erkindiktiń eren rýhyn pash etip, azattyqtyń shamyn jaqqan da jastar. Táýelsizdigimizdi tuǵyrly etken de, qalalar men dalalardy kórkeıtken de – sol jastar. Búgin mine, eldiktiń jolyn jalǵaǵan jigerli jastarymyz egemen elimizdi álemge tanytyp, mártebemizdi bıiktetip, mereıimizdi asyrýda.
О́zderińiz biletindeı, «Memlekettik jastar saıasaty týraly» zań qabyldandy. Jastardyń jasy 35 jasqa deıin ulǵaıdy, sol arqyly jastardyń sany 3,7 mln-nan 6 mln adamǵa deıin artty.
Budan basqa, 2029 jylǵa deıingi memlekettik jastar saıasaty týraly tujyrymdama qabyldandy. Onda jastardy jumyspen qamtý, kásipkerlikke baýlý, zamanaýı qundylyqtar men patrıottyq tárbıe, salaýatty ómir salty, NEET sanatyndaǵy jastar úlesin tómendetý, sondaı-aq aýyl jastaryn qoldaý máseleleri qarastyrylǵan.
Halyqaralyq jastar kúni qarsańynda «Jastarmen birge» atty aptalyq bastalǵanyn buǵan deıin habarlaǵan edik. 7-12 tamyz aralyǵynda elimizdiń búkil alańdarynda qaıyrymdylyq, volonterlik jáne ekologııalyq aksııalar, bos oryndar jármeńkesi, festıvaldar, semınarlar, konsertter jáne t. b. túrli is-sharalar uıymdastyryldy.Jastardy qoldaýǵa baǵyttalǵan jumystar júıeli túrde jalǵasa beredi», dep jazdy mınıstr.