Fýtboldan Konferensııa lıgasyna qatysyp jatqan elimizdiń eki komandasy ótken aptada atalǵan týrnırdiń úshinshi irikteý kezeńindegi alǵashqy matchtaryn ótkizip, kelesi kezeńge shyǵý múmkindigin qarymta oıynǵa qaldyrdy. Byltyrǵy el chempıonatynyń kúmis júldegeri «Aqtóbe» syrt alańda 12 jyldyq tarıhy bar Rýmynııanyń «Sepsı» klýbymen teń oınasa (1:1), qola júldeger «Tobyl» Qostanaıda Soltústik Irlandııanyń «Derrı Sıtı» komandasynan bir dop aıyrmasymen basym tústi – 1:0.
Bir dop aıyrmashylyǵy jeter me eken?
Keıingi jyldary Eýrokýbok oıyndaryna turaqty qatysa bastaǵan «Tobyl» men «Derrı Sıtı» osy týrnırdiń ekinshi kezeńinde úlken sensasııa jasap, jarystyń úshinshi aınalymyna joldama aldy. Qostanaılyq ujym ekinshi kezeńde Shveısarııanyń ataqty «Bazel» komandasyn eki oıynnyń qorytyndysy boıynsha 4:3 esebimen jarys jolynan yǵystyrsa, «Derrı Sıtı» bizdiń jankúıerlerge jaqsy tanys Fınlıandııanyń KýPS klýbynan basym tústi. О́z alańyndaǵy birinshi oıynda 2:1 esebimen jeńiske jetse, syrt alańdaǵy kezdesýde 3:3 nátıjesimen teń oınady. Esterińizde bolsa, 2021-22 jylǵy Konferensııa lıgasynyń úshinshi kezeńinde KýPS elordanyń «Astana» komandasyn eki oıynda 5:4 (1:1, 4:3) esebimen tize búktirgen edi.
Osylaısha, fýtbol mamandarynyń nazaryn ózderine aýdarǵan eki klýb arasyndaǵy oıyn kópshilik kútkendeı tartysty ótti. Birinshi taımnyń alǵashqy bóliginde qonaq komandanyń iri deneli fýtbolshylary bizdiń qaqpaǵa jarytyp shabýyl uıymdastyrmasa da, «Tobyl» oıynshylaryn jıi tártip buzýǵa ıtermeleýmen boldy. Irlandııalyqtardyń dóreki oıynyna bizdiń jigitter de dál solaı jaýap beremiz dep tóreshi tarapynan eskertý alyp qaldy. Alǵashqy 45 mınýttyń ishinde úsh fýtbolshymyz «sary qaǵazben» jazalandy. Match aldyndaǵy baspasóz konferensııasynda «Tobyldyń» bas bapkeri Mılıch Chýrchıch dál osy jaǵdaıdy eskerip, ırlandııalyq fýtbolshylardyń aılasyna túsip qalmaý mańyzdy ekenin, biz óz oıynymyzdy, olar óz oıyndaryn oınaýy kerek dep aıtqan edi. Biraq «Tobyl» fýtbolshylary kóp jaǵdaıda «Derrı Sıtıdiń» quryǵyna túsip qala berdi.
Ekinshi taımda oıyn qarqyny birshama báseńdegenimen, qostanaılyqtardyń shabýyly birinshi taımǵa qaraǵanda, ótkir bola bastady. Bálkim, úzilis ýaqytynda Chýrchıch shákirtterine shabýyldy aıaqtaý kezindegi qatelikterin eskertken bolar. Máselen, ekinshi 45 mınýtta «Tobyl» fýtbolshylary qarsylastardyń qaqpasyna tórt soqqy jasasa, sonyń úsheýi qaqpaǵa dál baǵyttaldy. Onyń bireýin golǵa aınaldyra aldy. Oıynnyń 65-mınýtynda «Tobyl» klýbynyń tárbıelenýshisi ári qorǵaýshysy Roman Asranqulov sol qaptaldan ırlandııalyqtardyń qorǵanysyn buzyp-jaryp, sol aıaǵymen ádemi gol soqty. «Derrı Sıtıdiń» qaqpashysy da, qorǵaýshylary da bul soqqynyń aldynda dármensizdik tanytty. Sóıtip, 90 mınýt boıy «Tobyldyń» shabýylshylary soǵa almaǵan goldy qorǵaýshy soǵyp, alǵashqy oıynda komandasyna basymdyq syılady – 1:0.
Endi eki ujym arasyndaǵy qarymta match 17 tamyz kúni Soltústik Irlandııada ótedi. «Derrı Sıtıdiń» Eýrokýboktaǵy bıylǵy oıyndarynyń statıstıkasyna qaraıtyn bolsaq, olar syrt alańdaǵy kezdesýlerge qaraǵanda, óz jerindegi matchtarda táýir oınaıdy eken. Konferensııa lıgasynyń alǵashqy eki irikteý kezeńiniń óz alańynda ótken eki oıynynda da olar qarsylastarynan basym túsken. Degenmen «Tobyl» da syrt alańda táýir oınaıtynyn ótken matchta kórsetti. Sondyqtan qarymta kezdesýde bizdi qyzyqty match kútip tur.
Syrt alańdaǵy teń oıyn úmit syılaıdy
Rýmynııada match ótkizgen «Aqtóbe» klýby alǵashqy oıynda qolda turǵan jeńisinen aıyrylyp qaldy. Degenmen birinshi matchtyń syrt alańda ótkenin eskersek, óz alańynda jeńiske jetýdiń múmkindigi kóbirek. 8 400 jankúıerge arnap salynǵan Sfyntý-George qalasyndaǵy «Sepsı Arena» stadıonyndaǵy matchta eki ujym da áý bastan teń nátıjeni kózdegen sııaqty.
О́ıtkeni eki klýb ta match boıy jarytyp shabýyl uıymdastyrǵan joq. Tek kezdesýdiń sońynda ǵana alań qojaıyndary esepti teńestirgen soń shabýyldaryn údete tústi. Al birinshi taımda eki klýb fýtbolshylary tek bir-bir márte ǵana qaýipti jaǵdaımen kózge tústi. Oıynnyń 15-mınýtynda Marıýsh Stefaneskýdyń qaqpaǵa enip bara jatqan dopty Stas Pokatılov qolymen qaqshyp jiberse, 28-mınýttaǵy Maksım Samorodovtyń alys buryshqa tepken dobyn «Sepsı» qaqpashysy qaıtardy. Birinshi taımda budan basqa aýyz toltyryp aıtarlyqtaı shabýyl bolǵan joq.
Ekinshi taımnyń basynda alań qojaıyndary oıyn tizginin óz qoldaryna alýǵa tyrysyp, dopty jıi baqylaýynda ustaı bastady. Kezdesýdiń 55-mınýtynda Stefaneský taǵy da «Aqtóbe» qaqpasyna qaraı baǵyttaǵan joıqyn soqqysymen kózge tústi. Abyroı bolǵanda Stas Pokatılov óz ornynan tabylyp, qaýiptiń betin qaıtardy. Arada 10 mınýt ótkende jerlesterimiz bul shabýyldyń qarymtasyn qaıtaryp qana qoımaı, «Sepsı» qaqpasyna gol soǵyp, oıynnyń esebin ashty. 65-mınýtta Maksım Samorodovtyń buryshtamadan áýelete kótergen dobyna birinshi Elder Santana jetip, basymen qaqpaǵa dál soqqy jasady – 1:0.
Gol ótkizip alǵan soń alań qojaıyndary esepti teńestirý úshin bar kúsh-jigerimen alǵa qaraı umtylyp, «Aqtóbe» qorǵaýshylary men qaqpashysyn qıyn jaǵdaıǵa salyp qoıdy. «Sepsı» fýtbolshylarynyń dúrkin-dúrkin shabýyly match sońynda ǵana óz nátıjesin berdi. Oıynnyń 89-mınýtynda Roland Varganyń aıyp alańy ishinde qaqpanyń sol jaq buryshyna qaraı tepken doby jol-jónekeı bir oıynshymyzǵa tıip, qaqpanyń oń jaq buryshynyń torynan tabyldy – 1:1. Tarazy basy teńeskennen keıin «Sepsı» jeńis golyn soǵýǵa umtyldy. Alaıda jerlesterimiz qorǵanysta saýatty oınap, alań ıelerine ekinshi goldaryn soǵýǵa múmkindik bermedi.
Eki ujym arasyndaǵy qarymta oıyn 17 tamyz kúni Aqtóbedegi Qobylandy batyr atyndaǵy ortalyq stadıonda ótedi.