Atyraý oblystyq tarıhı-ólketaný mýzeıinde qundy jádiger kóp. Kóne jádigerler toptamasynyń ishinde XIX-XX ǵasyrlarda qoldanylǵan aǵash jáne teri ydystar, at ábzelderiniń jıyntyǵy bar.
Jurtshylyqty qazaqtyń uly aqyny Abaı Qunanbaıulynyń tutynǵan buıymdary erekshe qyzyqtyrady. Qazir mýzeı qorynda aqynnyń úsh ishekti dombyrasy men toǵyzqumalaq taqtasynyń kóshirmesi tur. Toǵyzqumalaq taqtasyn salatyn dorbasy da bar. Dorba bylǵarydan tigilipti.
Úsh ishekti dombyranyń biraz ereksheligi bar. Ulttyq aspaptyń shanaǵy balqaraǵaıdan sopaqsha etip jasalypty. Shyrsha aǵashynan jasalǵan bet qaqpaǵynda úsh tesigi bar. Jalpaq moıynynyń ólshemi – 75h12 sm. Úsh ishektiń buraýyn keltiretin úsh qulaǵy bar.
Al toǵyzqumalaq taqtasy úsh bólek taqtaıdy bir-birine jalǵaý arqyly jasalǵan. Eki jaǵyndaǵy taqtaıdyń árqaısysynda 9 otaý bar. Ortańǵy bóligindegi taqtaıda sopaqsha pishinde ırektelgen gúl tárizdi eki qazan oıylǵan. Taqtaıdyń beti qońyr, eki qazannyń biri kók, ekinshisi qyzǵylt qońyr túspen boıalǵan. Otaýlarǵa aq, kók, qońyr sekildi birneshe tústi boıaý jaǵylǵan.
«Abaı murasyn urpaqtan-urpaqqa nasıhattaý maqsatynda «Jıdebaı-Bórili» memlekettik qoryq mýzeıimen jasalǵan kelisim bar. 2020 jyly aqynnyń ózi tutynǵan úsh ishekti dombyrasy men toǵyzqumalaq taqtasynyń kóshirmesi jasalyp, ǵylymı qorǵa alynǵan edi. Úsh ishekti dombyranyń qońyr úni qulaqqa jaǵymdy estiledi. Bul dombyrany kezinde Abaıdyń ózi de, uly Aqylbaı da jıi tartqan. Qazaqtyń ulttyq oıyny – toǵyzqumalaqty shákirtterimen birge, eki-úsh kúnge deıin oınaıtyn bolǵan. Oıyndy jaqsy kórgeni sonsha, qarsylasyn jeńbeı tynbaıdy eken», deıdi mýzeı qyzmetkerleri.
Atyraý oblysy