Qazaqstan Prezıdenti Qasym-Jomart Toqaev Vetnam Premer-mınıstri Fam Mın Chınmen kezdesti, dep habarlaıdy Egemen.kz Aqorda baspasóz qyzmetine silteme jasap.
Kezdesýde Memleket basshysy búgin Prezıdent Vo Vang Thyongpen nátıjeli kelissóz júrgizgenin jáne onyń barysynda ekijaqty yntymaqtastyqtyń negizgi baǵyttary talqylanǵanyn atap ótti.
«Búgin tańerteń Prezıdent Vo Van Thyongpen óte nátıjeli kelissóz júrgizdim. Biz kóptegen saladaǵy qarym-qatynastarymyz ben yntymaqtastyǵymyzdy nyǵaıtýǵa yqpal etetin óte mańyzdy ýaǵdalastyqtarǵa qol jetkizdik. Sondaı-aq Vetnam kásipkerlerimen kezdesý ótkizdim. Olardyń Qazaqstan naryǵyndaǵy qyzmetin qoldaýǵa daıynmyn. Biz elimizde vetnamdyq bıznestiń uzaq ýaqyt jumys isteýine shyn máninde múddeli bolǵandyqtan kómek kórsetemiz», dedi Qasym-Jomart Toqaev.
Memleket basshysy búgin qol qoıylǵan Saýda-ekonomıkalyq yntymaqtastyqty jedel damytý jónindegi úkimetaralyq birlesken is-qımyldar jospary saýda, ınvestısııa, tehnologııa, aýyl sharýashylyǵy, tranzıt jáne týrızm sııaqty mańyzdy salalar boıynsha eki eldiń ózara baılanystaryn jandandyrýǵa yqpal etetin negizgi qujat bolatynyna senim bildirdi.
Vetnam Premer-mınıstri Fam Mın Chın Qasym-Jomart Toqaevtyń sapary Qazaqstan men Vetnamnyń ekijaqty yntymaqtastyǵyna tyń serpin beretinin atap ótti.
«Eki tarap qol qoıǵan qujattar men kelisimder keleshekte yntymaqtastyǵymyzǵa berik negiz bolady. Sizben Qazaqstan men Vetnamnyń saıasat, dıplomatııa, ınvestısııa jáne saýda salalaryndaǵy qarym-qatynasyn odan ári damytyp, tereńdetý joldaryn talqylaýǵa múddelimiz», dedi Fam Mın Chın.