Aqtóbe qalasynda qazaqtyń tuńǵysh bard aqyny Tabyldy Dosymovtyń shyǵarmashylyǵyn nasıhattaý, úzdik avtorlyq ánderdi damytý maqsatynda «Sáıgúlik» II respýblıkalyq baıqaýy uıymdastyryldy. Saltanatty sharanyń gala-konsertine oblys ákimi Eraly Toǵjanov qatysty, dep jazady Egemen.kz Aqtóbe oblysy ákimdiginiń baspasóz qyzmetine silteme jasap.
«Án óneriniń ishinde bard janry – syrly sazymen, jańasha oryndalý stılimen erekshe. Ony alǵash ret qazaq ónerine engizgen – Tabyldy Dosymovtyń ánderi keń tynysty, ekpini shabytty. Ol gıtarasyna keń baıtaq qazaq eliniń rýhyn, namysyn qosty. Búgingi mereke – aǵamyzdyń ónerin baǵalap, eske alý bolsa, bir jaǵynan bard janryn nasıhattaý ári osy janrdaǵy oryndaýshylardyń ónerin qoldaý. Aqynnyń ánderi urpaqtan-urpaqqa jalǵasyp, jańa baǵyttaǵy oryndaýshylardyń sany artady dep oılaımyn», dep atap ótti Eraly Toǵjanov.
Baıqaýdyń qazylar alqasynyń sheshimimen, Bas júlde astanalyq ónerpaz Ashat Ámirǵalıevke buıyrdy. Al 1-oryndy − Ǵıbadat Turǵalıev, 2-oryndy − Nurdáýlet Aqqul, 3-oryndy Orynbasar Jumahanov pen Aıdar Dosymov ıelendi.
Ashyq aspan astynda ótken baıqaýǵa Astana qalasynan, Ulytaý, Túrkistan, Qyzylorda, Mańǵystaý, Atyraý, Batys Qazaqstan, Aqtóbe oblystarynan qatysqan 14 úmitker baıqaý talaby boıynsha T.Dosymovtyń bir patrıottyq, bir lırıkalyq ánderin oryndady.
Olardyń ónerin T.Dosymovtyń jary Qarlyǵash Ibatova, uly, ánshi Abyl Aıash jáne T.Dosymov atyndaǵy «Sáıgúlik» I respýblıkalyq baıqaýynyń Bas júldegeri Aıgúl Qubash baǵalady.
«Aqtóbe jerinde ákeme arnalǵan keremet keshtiń ótip jatqanyna qýanyshtymyn. Tabıǵat aıasynda án tyńdaý – bard janrynyń ereksheligi. Respýblıkalyq baıqaýdy uıymdastyrýǵa muryndyq bolǵan Aqtóbe oblysynyń ákimdigine, oblystyq halyq shyǵarmashylyǵy ortalyǵy, el aǵalaryna alǵysym sheksiz», dedi T. Dosymovtyń uly, ánshi Abyl Aıash.
Baıqaý aıasynda Tabyldy Dosymovqa arnalǵan «Iz tastap aqqan bir juldyz» ǵumyrnamalyq kitabynyń tusaýkeser rásimi ótti. Kitapta aqynnyń ǵumyry men shyǵarmashylyǵyna qatysty derekter, estelikter toptastyrylǵan.