QR Premer-mınıstri Álıhan Smaıylov 28 shilde men 8 tamyz aralyǵynda Qytaıdyń Chendý qalasynda ótken HHHI Dúnıejúzilik jazǵy Ýnıversıada jeńimpazdarymen kezdesti, dep habarlaıdy Egemen.kz Úkimettiń baspasóz qyzmetine silteme jasap.
Qazaqstannyń stýdentter quramasynda 11 sport túrinen: sadaq atý, sporttyq gımnastıka, kórkem gımnastıka, jeńil atletıka, semserlesý, dzıýdo, júzý, ústel tennısi, taekvondo, oq atý jáne ýshý boıynsha 90 sportshy qatysty. Nátıjesinde qurama komanda jalpy medaldyq esepte 119 eldiń arasynan 20-shy oryndy ıelendi.
Kezdesý barysynda Álıhan Smaıylov Memleket basshysynyń sportshylarǵa joldaǵan quttyqtaý sózin oqyp berdi.
«Sizderdi – HHHI Dúnıejúzilik jazǵy Ýnıversıadadaǵy jarqyn jeńisterińizben shyn júrekten quttyqtaımyn! Álemniń 119 eliniń órenderi baq synaǵan baıraqty básekede jastarymyz 2 altyn, 7 kúmis jáne 11 qola medalǵa ıe boldy. Stýdentterimizdiń bul jetistigi qazaq sportynyń tarıhyna altyn árippen jazylady. Sańlaq sportshylarymyz memleketimizdiń mereıin arttyryp, abyroıyn asqaqtatty. Biz olardy jas urpaqqa úlgi etýimiz kerek. Dúbirli dodaǵa qatysqan jastardyń bárine shynaıy rızashylyǵymdy bildiremin. Bolashaqta budan da bıik belesterdi baǵyndyryp, Qazaq elin álemge tanytasyzdar dep senemin. Barshańyzǵa zor densaýlyq, tolaǵaı tabys tileımin. Kók baıraǵymyz bıikte jelbirep, ánuranymyz árdaıym jeńis tuǵyrynan shyrqalsyn!», delingen Prezıdenttiń quttyqtaý hatynda.
О́z kezeginde Premer-mınıstr stýdent jastardan quralǵan qazaqstandyq atletter osy halyqaralyq jarystarda ózin laıyqty kórsetkenin atap ótti.
«Qazaqstandyqtar sizderdiń jeńisterińizdi maqtan tutady. Sizder Qytaıda elimizdiń abyroıyn asqaqtattyńyzdar», dedi Álıhan Smaıylov.
Sonymen qatar Úkimet basshysy Ýnıversıada bul tek jaı ǵana sport emes, eń aldymen, álemniń túkpir-túkpirinen kelgen stýdenttermen ózara jaqyndasa túsýge múmkindik beretin jastar alańy ekenin atap ótti. Bul rette ártúrli elderdiń azamattarymen dostyq baılanys ornatýdyń mańyzy erekshe.
Álıhan Smaıylov atap ótkendeı, búgingi tańda qazaqstandyq sport jańa esimderge, ıaǵnı dańqty sportshylardyń ornyn basatyn sportshylarǵa muqtaj. Sondyqtan da Ýnıversıadadaǵy búgingi jeńister – bul bolashaqtaǵy olımpıadalyq jetistikterge aparatyn naqty qadam.
«Úkimet atynan jáne jeke óz atymnan laıyqty óner kórsetkenderińiz úshin barlyq jattyqtyrýshylar men jas sportshylarǵa, sondaı-aq ata-analaryńyzǵa alǵys aıtamyn. Biz sizderdiń sporttaǵy jeńisterińiz syılaǵan qýanyshty sátterge rızashylyq bildiremiz. Sizderden jańa jetistikter men rekordtar kútemiz!», dep túıindedi ol sózin.
Premer-mınıstrmen kezdesýge sadaq atýdan kúmis júldeger Dıana Tursynbek, oq atýdan kúmis júldeger Nıkıta Chırıýkın, oq atýdan kúmis jáne qola medaldar jeńip alǵan júldegerler komandasy: Islam Sátpaev, Konstantın Malınovskıı jáne Nıkıta Shahtorın, dzıýdodan qola medaldar jeńip alǵan júldegerler komandasy: Suńǵat Jubatqan, Asqar Narqulov pen Bekarys Sádýaqas qatysty.
Sondaı-aq qatysýshylar arasynda taekvondodan qola júldegerler Beksultan Musahan, Abdýrahmon Marıpov, Beıbarys Qablan jáne Shamsat Dúısenov, ýshýdan qola júldegerler Aıkerim Tórehanova jáne Beksultan Qoskenov, semserlesýden qola júldegerler Janat Nábıev, Nazarbaı Sattarhan jáne Artem Sarkısıan boldy.
Kezdesý barysynda birneshe sportshy quttyqtaý sóz sóıledi. О́z kezeginde Suńǵat Jubatqan Qazaqstan qorjynyn altyn medalmen tolyqtyrǵysy kelgenin, alaıda bul joly qola júldege qol jetkizgenin atap ótti.
«Kelesi joly altyn alamyz dep úmittenemin. Qoldaýlaryńyz úshin kóp rahmet. Elimizdiń týy árqashan jeńis tuǵyrynda jelbiresin!», dedi ol.
Nazarbaı Sattarhan da qoldaý úshin alǵysyn aıtyp, qazaqstandyq sportshylardyń joǵary jetistikterge basa nazar aýdaryp otyrǵanyn atap ótti.
«Biz toqtamaımyz jáne alda budan da jaqsy nátıje kórsetemiz», dedi ol.
Kezdesý barysynda Úkimet basshysy HHHI Dúnıejúzilik jazǵy Ýnıversıada jeńimpazdaryna alǵys hattar men estelik syılyqtar tabys etti.