Qostanaıda «Mereıli otbasy» ulttyq baıqaýynyń oblystyq kezeńi qorytyndylandy. Otbasy qundylyqtaryn dáripteıtin dástúrli baıqaýǵa bıyl 40 áýlet qatysyp otyr. Oblys ákimdiginiń májilis zalynda ótken saltanatty jıynda solardyń ishinen iriktelip shyqqan 20 otbasyna syı-sııapat kórsetilip, arnaıy dıplomdar tabys etildi.
Oblystyq qoǵamdyq damý basqarmasy basshysynyń orynbasary Abylaıhan Kákenovtyń aıtýynsha, el kóleminde osymen onynshy, al oblysta toǵyzynshy ret ótip jatqan baıqaýǵa búginge deıin óńirden óz aýyl-aımaǵynda kópke úlgi-ónege bolyp otyrǵan 800-den asa otbasy qatysqan. Bıylǵy baıqaýdyń bir ereksheligi – jas otbasylar jaǵy basym. Olardyń ishinde qazaqtardan bólek, polıak, ýkraın, ázerbaıjan, sheshen ultynyń ókilderi de bar.
Saltanatty jıynǵa qatysýshylardy áýeli oblys ákiminiń orynbasary quttyqtady.
– Otbasy – qoǵamdy jańǵyrtý men biriktirýge shaqyratyn, kez kelgen ortada abyroıly bolýǵa tárbıeleıtin áleýmettik-mádenı ınstıtýt. Halqymyz úshin qasterli, qasıetti uǵym. Qazaqtyń «Otan otbasynan bastalady» degen dana sózi beker aıtylmaǵan. Sebebi urpaqtar sabaqtastyǵy, úlkenge qurmet, kishige qamqorlyq syndy asyl qasıetter otbasynda qalyptasady. Biz úshin talaı jyldan beri ótip kele jatqan «Mereıli otbasy» baıqaýynyń mańyzy zor. Osy saltanatta oblysymyzdyń túkpir-túkpirinen kelgen kópshilikke úlgi bolatyn otbasylarǵa alǵys aıtyp, qurmet kórsetpekpiz. Búginde elimizde kópbalaly otbasylarǵa, jas otbasylarǵa, sondaı-aq tolyq emes otbasylarǵa kóptegen qamqorlyq, qoldaý kórsetiledi. Mysaly, Qostanaı oblysynda «Qostanaı jastary» turǵyn úı baǵdarlamasy iske asyrylyp jatyr. Bul baǵdarlamaǵa byltyr 700 mln teńge bólinip, 200-ge jýyq jas otbasy jaǵdaılaryn jaqsartyp aldy. Bıyl atalǵan baǵdarlamaǵa 2 mlrd teńgeden asatyn qarjy bólinip, páter jaldap júrgen jas otbasylardyń baspanaly bolýyna jol ashylyp jatyr, – dedi R.Muhametqalıev.
Úmitkerlerdiń arasynda qarapaıym eńbekkerler áýleti, sportshylar, muǵalimder, dárigerler otbasy bar. Mysaly, Arqalyq qalasynan kelgen Erádilov otbasyn alsaq, otaǵasy qalalyq balalar jáne jasóspirimder sport mektebiniń aǵa bapkeri Azamat – talaı balany ulttyq kúreske baýlyǵan tálimger, Qazaqstannyń sport sheberi, «Qurmetti sport qyzmetkeri» tósbelgisiniń ıegeri, qazaq kúresinen Ulttyq sporttyq tóreshisi, birneshe ret «Úzdik bapker» atanǵan abzal azamat. Jubaıy Gúlden Qoqashova Arqalyq polıtehnıkalyq kolledjinde ustazdyq etedi. 2018 jyly Jańashyl pedagog atanǵan, Arqalyq ákiminiń qurmet gramotasymen marapattalǵan. Osy úıdiń tuńǵyshy Aıarý Keıki batyr atyndaǵy orta mekteptiń 9-synybynda oqıdy. Informatıka, aǵylshyn tili pánderi boıynsha ótken bilim baıqaýlarynda, sondaı-aq zııatkerlik olımpıadalarda júldeli oryndardan kórinip keledi. Ortanshy ul Nurasyl atalǵan mekteptiń 7-synyp oqýshysy, qazaq kúresinen ótip turatyn aýdandyq, qalalyq jarystarda júldeli oryndardy jeńip alyp júr.
Baıqaýǵa túsken 20 úmitkerdiń ishinen Altynsarın aýdanyna qarasty Sherbakov aýylynda turatyn Ermaǵambetov otbasynyń baǵy asyp, bas júlde buıyryp, bıylǵy mereıli otbasy atandy. О́sip-óngen áýlettiń aqsaqaly Áltaı qarııa men Zylıha ájeı tárbıelep ósirgen 10 baladan búginde 20 shaqty nemere-shóbere súıip otyr. Áltaı Ermaǵambetov Naýryzym aýdanynda 40 jyl mehanızator bolyp jumys istegen. Zeınettegi qarııa úıde bir kún qol qýsyryp qarap otyrýdy bilmeıdi. Qoǵamdyq jumystarǵa belsene aralasyp, únemi shapqylap júredi. Aýdandyq ardagerler keńesi men jergilikti ákimdik janyndaǵy qoǵamdyq keńestiń múshesi. Balalarynyń bári qazir bólek-bólek úı bolyp, árqaısysy óz ornyn tapqan. Ortanshy qyzy Gúlshat Keneshovanyń mamandyǵy tárbıeshi bolǵanymen, mektepte vahter bolyp jumys isteıdi. Joldasy Tóleýhan ekeýi tórt bala tárbıelep otyr. Tóleýhan – qazir kúzgi jıyn-terin jumystarynda. Odan bosaǵan soń qystaı úı sharýasymen aınalysyp, qoldaǵy malyna qaraıdy. Gúlshat bos ýaqytynda tapsyryspen kórpe-jastyq, dorba, qyz jasaýyna qajet buıymdar tigedi. Onyń syrtynda neshe túrli shaǵyn kádesyılar jasap satyp, tabys qylady. Ismer osy ónegeniń bári anasynan juqqanyn aıtady.
– Anashym men es bilgeli úsh jerde jumys istep júrip bizdi baqty, qaqty, jetkizdi. Qoly qalt etkende tigin tigip, jún ıirip, shulyq toqyp otyratyn. Sonyń bárin kórip óstik. Anam qazir úsh sıyr, men bes sıyr saýamyn. Onyń qurty, irimshigi, qaımaq-maıy qysy-jazy úzilmeıdi, –deıdi ismer.
Áltaı qarııanyń kenjesi Jansaıa Ermaǵambetova – sport sheberi. 2022 jyly ulttyq sport túri jekpe-jekten Qazaqstan chempıony, Qazaqstan kýbogynyń ıegeri. Pankratıonnan Qazaqstan birinshiliginiń kúmis jáne qola júldegeri. 2021 jyly Abý-Dabıde ótken halyqaralyq jarysta qola medal utyp alǵan. Qazir óńirdiń tańdaýly kásibı sportshylarynyń sanatynda.
Aldaǵy ýaqytta Ermaǵambetov otbasy oblys atynan Astanada ótetin «Mereıli otbasy» ulttyq baıqaýyna qatysady.
Qostanaı oblysy