Prezıdent 2029 jylǵa qaraı energııa shyǵynyna baılanysty negizgi kórsetkishter keminde 15 paıyzǵa azaıatynyn aıtty, dep habarlaıdy Egemen.kz.
«Eldi gazben qamtamasyz etý de – ózekti másele. Taýarly gazdyń resýrstyq bazasyn keńeıtý – Úkimettiń jáne ulttyq gaz kompanııasynyń basty mindeti. Jańa gaz óńdeý zaýyttarynyń qurylysyn tezdetý jáne qoldanystaǵy zaýyttardyń qýatyn barynsha paıdalaný qajet. Elimizdegi Teńiz, Qashaǵan, Qarashyǵanaq sııaqty munaı-gaz alpaýyttary gazdy qoljetimdi baǵamen usynýǵa tıis. Sonymen qatar jańa gaz kenishterin barlaý jáne ıgerý úshin ınvestısııa tartý asa mańyzdy. Elektr qýaty, jylý jáne sý – turmysqa asa qajetti ıgilikter. Ony únemdep paıdalaný kerek. Bul jańa turmystyq mádenıetke aınalýy qajet.Jalpy, bul – úı sharýasyna ǵana emes, tutas ekonomıkaǵa ortaq talap. Qazir sýdy ońdy-soldy paıdalanýǵa múlde bolmaıdy. Úkimet energetıkalyq tıimdilik saıasatyn túbegeıli qaıta qaraýǵa tıis. Onda Ekonomıkalyq yntymaqtastyq jáne damý uıymynyń standarttary eskerilýi kerek», dedi Memleket basshysy.
Onyń aıtýynsha, 2029 jylǵa qaraı energııa shyǵynyna baılanysty negizgi kórsetkishter keminde 15 paıyzǵa azaıýǵa tıis.«Energetıkany tıimdi paıdalanýǵa jáne basqa da resýrstardy únemdeýge qatysty naqty normatıvtik talaptardy birtindep engizý qajet. Biz «jasyl» ekonomıkany damytý máselesimen myqtap aınalysýymyz kerek. Bolashaqta búkil álem taza energetıkaǵa kóshetini sózsiz», dedi ol.