Almaty oblysynda ótip jatqan oqý-jattyǵýǵa kelgen Qorǵanys mınıstri, general-polkovnık Rýslan Jaqsylyqov jeke quramǵa Prezıdenttiń Qazaqstan halqyna Joldaýynyń basymdyqtaryn jetkizdi.
Memleket basshysy aıtqan negizgi másele – armııany joǵary tehnologııalyq qarý-jaraqpen jáne áskerı tehnıkamen qamtamasyz etý qajettiligi. El Prezıdenti qorǵanys-ónerkásip keshenin jan-jaqty nyǵaıtýdy mańyzdy máselelerdiń biri dedi. Damyǵan memleketterde qorǵanys-ónerkásip kesheni ulttyq qaýipsizdikti qamtamasyz etýde sheshýshi ról atqarady. Sondyqtan eń mańyzdy mindet – ımporttyq ónimderge táýeldilikti tómendetýge múmkindik beretin lokalızasııanyń joǵary úlesi bar óndiris aınalymyn qurý.
Qazaq áskerin brondy tehnıkamen, ushqyshsyz basqarylatyn qurylǵylarmen, zamanaýı atys qarýymen qamtamasyz etý qajet. Tehnıkany jedel jóndeý boıynsha óndiristi nyǵaıtýdy, otandyq kásiporyndardy qoldaýdy kúsheıtý qajet. Bul rette Memleket basshysy bizde qajetti materıaldyq-tehnıkalyq baza, quzyret pen kadrlar bar dep atap ótti.
«Olarǵa tıisti vedomstvolardyń tapsyrystary qajet. Qazirgi zamanǵy tehnologııalardy transfertteý jáne jańa óndiristerdi oqshaýlaý jónindegi jumys jalǵasýǵa tıis. Otandyq kásiporyndardy qarjymen tikeleı qoldaý tetigi – qorǵanys-ónerkásip keshenin damytýdyń arnaıy qory», dedi el Prezıdenti Qasym-Jomart Toqaev. Qorǵanys mınıstri Qarýly kúshter otandyq qorǵanys-ónerkásip keshenin belsendi qoldaıtynyn atap ótti.
«Qarýly kúshterdiń memlekettik qorǵanys tapsyrysyn otandyq jáne sheteldik qorǵanys-ónerkásip kesheniniń kásiporyndary qamtamasyz etedi, sonymen qosa Qarýly kúshterdegi qazirgi qarý-jaraq pen áskerı tehnıkanyń 50 paıyzdan astamy – otandyq ónim. Qazaqstandyq óndiristerde áskerı tehnıkanyń keń spektri, sonyń ishinde T-72, BMP-2 jáne BTR-80 tankteri kúrdeli jóndeýden ótedi. Máselen, Qurlyq áskerleri úshin otandyq qorǵanys kásiporyndary brondalǵan dóńgelekti mashınalardy jetkizedi. Áýe qorǵanysy kúshteri úshin «Granıt» AKTB» JShS bazasynda «NUR» GM-403 3 koordınattyq stansalar shyǵarylady jáne «S-300PS» zenıttik-zymyrandyq keshenderdi kúrdeli jóndeý júzege asyrylady. «Zenıt» Oral zaýyty» AQ Áskerı-teńiz kúshteri úshin kópfýnksıonaldy keme qurastyryp jatyr. Jalpy, Qorǵanys mınıstrligi otandyq qorǵanys-ónerkásip kesheniniń kásiporyndarymen turaqty ózara is-áreket jasaı otyryp, ony úzdiksiz damytýǵa basymdyq beredi», dep túıindedi sózin qorǵanys salasynyń basshysy.