О́tken aptada shaǵyn fýtboldan BAQ ókilderi arasynda О́skemen qalasy ákiminiń kýbogine respýblıkalyq týrnır ótti. Qala kúnine oraı uıymdastyrylǵan fýtbolda salaýatty ómir saltyn nasıhattap júrgen ár óńirdiń jýrnalısteri bas qosty.
Týrnırge elimizdiń ár óńirinen kelgen 8 komanda qatysty. Olar eki topqa bólinip, ózara myqtyny anyqtap alǵan soń tórt komanda jartylaı fınalǵa shyqty. Jartylaı fınalda astanalyq «Qaz365.kz» pen «Qazmedıa», taldyqorǵandyq «Qareket» pen Taraz qalasynan kelgen «Taraz press» komandalary ózara baq synasty. Fınalǵa joldama úshin oıyndarda elordalyq «Qaz365.kz» qarsylasynan basym tússe, ekinshi jupta «Qareket» basym tústi. Nátıjesinde fınalǵa «Qaz365.kz» pen «Qareket» shyqty. Al «Qazmedıa» men «Taraz press» úshinshi oryn úshin talasty.
Jarys nátıjesinde «Taraz press» qola júldeger atanyp, 400 myń teńge aqshalaı syıaqyǵa ıe boldy. Fınalda qarsylaspen teńbil dopqa teń talasyp, bir sátti ǵana múlt jibergen «Qarekettiń» jigitteri 700 myń teńgeniń sertıfıkatyna ıe boldy. Al «Qaz365.kz» komandasy О́skemen qalasy ákiminiń kýbogi men 1 mıllıon teńgeniń sertıfıkatyn jeńip aldy.
Tartysty týrnırde sheber oıyn kórsetken jýrnalıster de shet qalmaı, laıyqty marapattarǵa ıe boldy. Týrnırdiń «Úzdik oıynshysy» nomınasııasy «Qaz365.kz» komandasynan Baqytjan Masaqovqa berildi. Eń kóp gol salǵan «Qazmedıa» ókili Eldos О́mirhan «Úzdik surmergen» atansa, tarazdyq Jasulan Aıtqulov «Úzdik qorǵaýshy» atalymyn aldy. Jer jánnáti Jetisýdan kelgen Samat Esentaıuly «Úzdik qaqpashy» atandy. «О́skemen» komandasynyń ókili Ońǵar Qabden «Úzdik shabýylshy» nomınasııasyn enshiledi. Olarǵa estelik músinsheler men 50 myń teńgeniń sertıfıkaty berildi.
– Týrnır joǵary deńgeıde ótti. Respýblıkalyq jarysqa Kókpekti aýdanynyń atynan qatysyp, elimizdiń ár óńirinen kelgen áriptestermen aralasyp, arqa-jarqa bolyp qaldyq. Mundaı is-sharalardy jıi ótkizý aradaǵy áriptestik baılanystyń bekı túsýine, bir-birimizben tájirıbe almasýǵa zor yqpal etedi. Maqsat júlde emes – joldastyq qarym-qatynas, dostyq oıyn. Osy jaǵynan alǵanda bul fýtbol básekesi óziniń mıssııasyn tolyq oryndady. Osyndaı sporttyq sharany ótkizýge muryndyq bolǵan, qoldaý kórsetken О́skemen qalasynyń ákimdigine alǵys aıtamyz, – deıdi Abaı oblysy, Kókpekti aýdanynyń namysyn qorǵaǵan «Kókpekti» komandasynyń kapıtany, «Juldyz-Novaıa jızn» gazetiniń redaktory Darhan Berdibek.
Shyǵys Qazaqstan oblysy